“Queremos convertela na mellor área recreativa da comarca de Deza, incluso da Galicia interior”, recalca o alcalde, Luis Calvo
Ecos da Comarca/Agolada
Os operarios municipais de Agolada traballan estes días no acondicionamento da área recreativa da parroquia de Brocos. O alcalde, Luis Calvo, avanza que en primavera está previsto unha importante inversión neste lugar.
Estes días o Concello está traballando na limpeza, retirada de árbores e arbustos secos e no nivelado de varios tramos para a zona de baño. Este martes o rexedor e o concelleiro de Obras, Pedro García, estiveron supervisando a actuación.
Ademais, en vindeiros meses acondicionarase o vial de acceso á área recreativa. “O proxecto xa está acabado e agora está a espera da licitación”, indica o mandatario.
O equipo de goberno do PAYJ traballa nun proxecto importante de acondicionamento desta área. “Pretendemos dotala de distintos servizos, mellorar os accesos e convertela na área recreativa máis importante de toda a comarca, incluso, da Galicia interior”, recalca o mandatario, quen avanza que está previsto realizar esta actuación en primavera e que contará cunha inversión duns 100.000 euros. Nos vindeiros meses darase todos os detalles deste proxecto.
