A Xunta reúnense cos alcaldes de Galicia para reforzar a coordinación fronte aos incendios forestais

Ecos da Comarca/Xeral

A Xunta, dende as distintas delegacións territoriais, mantivo, onte, martes 19 de agosto unha reunión con todos os alcaldes de Galicia para abordar o tema dos incendios forestais e reforzar a súa coordinación para loitar contra eles.

Reunión con alcaldes do distrito III, que abarca varios concellos das comarcas.

Na xuntanza, representantes da Xunta lembraron que “estamos ante unha situación excepcional, que obriga a dar prioridade absoluta á defensa das persoas e das vivendas naqueles lugares onde os incendios están a avanzar con especial violencia”. Así mesmo, as representantes da xunta incidiron na importancia de manter activa a coordinación e as vías de contacto entre as administracións para poder facer fronte ás posibles ameazas que se presenten nas próximas semanas, "aínda que a situación na provincia da Coruña non reviste a gravidade da provincia de Ourense, non debemos baixar a guardia e seguir extremando todas as precaucións".

Pola súa banda, explicaron que dende o 1 de agosto rexistráronse 492 incendios en Galicia, uns 370 máis que no mesmo período do ano pasado. Só na xornada do domingo chegaron a declararse preto de 30 novos lumes en toda a comunidade, a maiores dos que xa estaban activos.

Publicidade

Preme na imaxe para obter máis información do evento.

Para facer fronte a esta situación, sinalan que a Xunta despregou o maior operativo da súa historia, composto por máis de 3.000 profesionais do Servizo de Prevención e Defensa contra Incendios Forestais, aos que se suman máis de 200 bombeiros, GES e Protección Civil, 343 efectivos de brigadas municipais, 380 motobombas, 36 buldócer, 10 batracios e 32 medios aéreos, ademais de persoal da Policía Autonómica, da UME e das Forzas e Corpos de Seguridade do Estado.

Chamamento á colaboración dos concellos

Durante a reunión, as delegadas e delegados da Xunta agradeceron a colaboración dos concellos e, ao mesmo tempo, solicitaron aos alcaldes que extremen a vixilancia en zonas de especial sensibilidade, como áreas de interface urbano-forestal, espazos protexidos ou lugares con elevada carga vexetal. Tamén se lles pediron que revisen o estado das faixas secundarias e que informen aos veciños da importancia de manter estes espazos libres de biomasa.

Publicidade

Preme na imaxe para obter máis información do evento.

Así mesmo, instouse aos concellos a dispoñer dos seus medios humanos e materiais preparados para ser activados en caso de emerxencia, revisar os puntos de auga municipais e manter operativas as brigadas municipais previstas nos convenios.

Finalmente, lembróuselles a importancia de dar aviso inmediato ao 085 ante calquera incendio e de seguir colaborando co operativo da Xunta, tal e como veñen facendo habitualmente.

Nesa mesma liña, subliñaron que moitos dos lumes que se están producindo son claramente intencionados e que “quen pon en perigo vidas humanas e fogares atopará sempre a tolerancia cero por parte da Xunta, coa esixencia de que todo o peso da lei caia sobre eles”.