A Xunta reforza o dispositivo para a salvagarda dos espazos naturais ante os incendios forestais

Rueda detalla o paquete de axudas da Xunta que se aprobará a semana que vén para os afectados

Ecos da Comarca/Xeral

A Consellería de Medio Ambiente e Cambio Climático está a reforzar o sistema de protección e salvagarda dos espazos naturais protexidos afectados polos incendios forestais.

Nese senso, están declaradas obras de emerxencia no Parque Natural do Invernadeiro, onde se están a empregar dúas máquinas pesadas para mellorar os cortalumes perimetrais. Tanto nese espazo protexido como no da Serra da Enciña da Lastra tamén se están a desenvolver actuacións de ataque manual a frontes de lume para aumentar a salvagarda ante os incendios.

Un coche dun axente medioambiental o sábado no lume da zona do Meire (Melide). Autor: Ecos da Comarca.

Na provincia de Lugo tamén se vai declarar a emerxencia para os traballos de palas retroexcavadoras para a mellora dunha pista co obxectivo de garantir o acceso e a operatividade dun punto de auga moi estratéxico no Courel e de grande importancia para atallar os lumes activos.

Ademais, todos os axentes medioambientais da Dirección Xeral de Patrimonio Natural están en situación de garda e á disposición dos servizos provinciais de Prevención de Incendios Forestais. En concreto, as actuacións a desenvolver son a vixilancia de novos incendios, a supervisión de perímetros de lumes controlados ou labores de loxística.

Publicidade

Preme na imaxe para obter máis información do evento.

A maiores, de xeito excepcional, aqueles axentes que teñan a formación e experiencia necesaria poden integrarse de maneira voluntaria na extinción de incendios. Neste caso a Consellería do Medio Rural encárgase de dotalos dos epis de seguridade e das emisoras de traballo coas frecuencias do operativo de extinción.

Por outra banda, o presidente da Xunta, Alfonso Rueda, compareceu onte para dar conta do avance na configuración das axudas que se aprobarán a semana que vén para facer fronte aos danos provocados polos lumes forestais, especialmente na provincia de Ourense.

Nesta liña, o titular do Executivo galego sinalou que en canto estean controlados os lumes, tocará cuantificar os danos para de inmediato resarcir aos damnificados para que recuperen todo o que perderon. Por iso, desde a Goberno galego convocarase un Consello extraordinario en Ourense para aprobar a configuración das axudas e solicitarase ao resto de Administracións, tanto locais como estatal, que se involucren na recuperación dos danos.

Rueda recalcou que os apoios dirixiranse aos afectados para paliar os danos que sufriron, e poderán estenderse entre outros a explotacións forestais, agrícolas ou gandeiras; titulares de tecores; establecementos comerciais, industriais, turísticos ou deportivos; infraestruturas e para o arranxo das vivendas afectadas, ademais de axudar co aloxamento provisional ás persoas afectadas.

Despois de facer o balance da situación actual dos lumes, o presidente comunicou os medios incorporados polo Estado ao dispositivo nas últimas horas:

• Arredor de 200 militares para prestar apoio ao traballo que efectúa a Garda Civil, así como outros 58 da operación centinela

• 4 operadores de máquinas para traballar como cortalumes

• 3 buldozers previstos para chegar onte

• Distinto material de intendencia, como camións, autobuses e grupos electróxenos

  
  

Nesta liña, Rueda agradeceu o envío de medios por parte do Estado, pero incidiu que non son suficientes e que se precisan máis medios dispoñibles de inmediato e sen máis dilacións, especialmente maquinaria pesada e medios aéreos. Ademais, o titular do Executivo galego recalcou que que os únicos recursos que Galicia albergou estes días procedentes de Fondo de Solidariedade Europea foron dous hidroavións FOCA desde Francia e que agora mesmo non hai ningún outro medio procedente dun país europeo traballando na nosa comunidade.

Publicidade

Preme na imaxe para contactar connosco.

Por outra banda, o presidente aproveitou para agradecer o esforzo e o traballo de todas as persoas que levan traballando sen descanso na extinción dos lumes.

En canto as comunicacións, o presidente indicou que nas vindeiras horas está previsto que se tome unha decisión sobre o restablecemento das conexións ferroviarias entre Galicia e a Meseta.