A Xunta pon en valor a Eferro Foliada como unha experiencia que une cultura, tradición e lingua

A cita será o 12 de setembro na parroquia cruceña de Merza

Laura Moure/Vila de Cruces

O director de Turismo de Galicia, Xosé Merelles, xunto ao secretario xeral da Lingua, Valentín García, presentaron o festival Eferro Foliada 2026, que se celebrará o vindeiro 12 de setembro en Merza, na zoqueira Eferro Zocos, unha nova edición que volve situar o rural galego como escenario e motor de cultura, dinamización económica e atracción turística, nunha reivindicación do potencial do rural galego para crear cultura, atraer visitantes e preservar a identidade propia.

Durante a súa intervención, Xosé Merelles destacou a capacidade de Eferro Foliada de converter a contorna rural nun espazo de encontro no que se combinan música, arte, gastronomía, artesanía, tradición e actividades para todos os públicos, cunha “fórmula que encaixa coa aposta de Turismo de Galicia por diversificar a oferta, crear novas experiencias e poñer en valor os recursos culturais, naturais e etnográficos propios de cada territorio”.

Esta iniciativa naceu da man da artesá Elena Ferro, terceira xeración unha familia especializada na elaboración de zocos de madeira, e da Asociación Cultural Zoqueira de Merza, coa finalidade de dinamizar o rural a través da cultura, atraer visitantes ás pequenas localidades e reivindicar a lingua e as manifestacións culturais propias de Galicia.

O director de Turismo de Galicia subliñou a traxectoria de Elena Ferro ao conseguir “transformar a percepción dun produto tradicional asociado ao traballo do campo e convertelo tamén nun complemento con novos deseños sen renunciar ao coñecemento artesanal transmitido durante xeracións”.

 PUBLICIDADE

Preme na imaxe para obter máis información deste evento.

A programación de 2026 desenvolverase ao longo de toda a xornada na contorna da casa-taller de Eferro, de maneira que os asistentes poderán non só gozar das actividades organizadas, senón tamén coñecer de preto o espazo creativo e o proceso tradicional de elaboración dos zocos.

En edicións anteriores, a iniciativa foi capaz de reunir arredor de 4.000 persoas, demostrando a capacidade do rural galego para acoller propostas culturais con capacidade de convocatoria e proxección máis aló do propio territorio. Para esta edición está prevista, ademais, unha ampliación do espazo que permitirá triplicar a capacidade de acollida respecto da edición anterior.

 PUBLICIDADE

Preme na imaxe para contactar connosco.

A Eferro Foliada incorpora tamén unha clara dimensión de defensa e promoción da lingua galega e das manifestacións culturais propias, entendendo a cultura como unha ferramenta para atraer persoas ás pequenas localidades e reforzar o sentimento de pertenza.

Esta aposta pola cultura e pola identidade local encaixa coa maneira na que Turismo de Galicia presenta as celebracións tradicionais: como espazos de encontro, identidade e hospitalidade capaces de converter cada recuncho do territorio nun atractivo para visitantes.