A Xunta pon en marcha o Programa de inspección ambiental para 2026

O obxectivo "é garantir o cumprimento da normativa sectorial vixente"

Ecos da Comarca/Xeral

A Xunta de Galicia pon en marcha o Programa de inspección ambiental para 2026 que ten como obxectivo garantir o cumprimento da normativa sectorial vixente a través de visitas a diferentes instalacións e actividades susceptibles de afectar negativamente ao medio ambiente da Comunidade. Este programa, que se enmarca no Plan de inspección ambiental de Galicia 2025-2030, conta con cinco ámbitos de actuación en función do suxeito que se someta a vixilancia: instalacións con autorización ambiental integrada (AAI), traslado de residuos, xestores de residuos, vertedoiros e outras actividades.

A través destes cinco plans específicos de traballo preténdese conseguir unha maior eficiencia na inspección, comprobando que as distintas instalacións cumpren coa normativa sectorial vixente e centran os seus esforzos en evitar ou, cando isto non sexa posible, reducir e controlar a contaminación sobre os distintos vectores ambientais.

A previsión deste programa é que os inspectores ambientais da Xunta leven a cabo unhas 300 actuacións que requiren un maior coñecemento técnico. Esta estimación inclúe as inspeccións programadas e as non programadas. Estas últimas son aquelas que se realizan preceptivamente -previas ao outorgamento dunha autorización-, de oficio -cando se recibe información de feitos que poden provocar danos no medio-, de xeito reactivo -cando existe unha denuncia- ou por seguimento -para comprobar a corrección de desviacións atopadas nunha inspección anterior-.

Por outra banda, os axentes da Unidade de Policía Nacional adscrita á Comunidade (UPA) tamén colaboran na execución deste programa de inspección ambiental e teñen previsto realizar máis de 300 inspeccións planificadas. Neste caso, a súa acción centrarase no subprograma de vertedoiros e, en concreto, nos puntos de vertido incontrolados de residuos. A maiores, tamén farán inspeccións non planificadas, que, na maior parte dos casos, terán como obxecto a comprobación das condicións de almacenamento e xestión de residuos.

 Publicidade

Preme na imaxe para obter máis información.

De forma complementaria, este programa inclúe tamén un plan transversal de xestión da calidade da inspección ambiental que busca a mellora continua dos procesos de inspeccións que permitan adaptarse as novidades normativas e optimizar os recursos dispoñibles e a eficacia do esforzo.

O Plan de inspección ambiental de Galicia 2025-2030, que define as liñas estratéxicas e o marco de actuación a seguir nese período, desenvólvese a través de sucesivos programas anuais, como o deseñado para 2026, para ter un control sobre as actividades implantadas no territorio e as repercusións que estas poidan ter sobre o medio ambiente e a saúde.

Publicidade

Preme para contactar con nós e pregunta polas tarifas que son unha bicoca!

Cómpre lembrar que no período de vixencia do anterior Plan de inspección ambiental (2019-2024) realizáronse un total de 7.940 visitas. Só o 14% das inspeccións derivaron en sancións e case o 60% das instalacións sometidas á normativa de prevención e control integrados da contaminación incrementaron o grao de cumprimento da súa autorización ambiental. No caso destas empresas, nas máis de 800 inspeccións levadas a cabo só nun 7% atopáronse desviacións moi relevantes para o medio ambiente.

Ademais, constatouse unha mellora xeneralizada do cumprimento ambiental por parte dos sectores obxecto de inspección —talleres, depósitos de chatarra, puntos limpos...— e unha diminución dos puntos de vertidos incontrolado (PVI) de residuos en Galicia.