A Xunta e a Federación Galega de Caza analizan medidas a desenvolver para a xestión do xabaril

Ángeles Vázquez insiste na importancia de artellar medidas de control para incrementar e facilitar os mecanismos necesarios para regular as poboacións desta especie

Ecos da Comarca/Xeral

A conselleira de Medio Ambiente e Cambio Climático, Ángeles Vázquez, analizou este xoves co presidente da Federación Galega de Caza, Luis Eusebio Fidalgo, as medidas a desenvolver para a xestión do xabaril. Durante o encontro, ao que tamén asistiron os presidentes provinciais da Federación, coincidiron na necesidade de levar a cabo accións para o control desta especie logo de que un estudio elaborado pola Xunta estimase en máis de 82.000 exemplares a poboación de xabarís na Comunidade.

Nese senso, a conselleira insistiu na importancia de artellar medidas de control co fin de incrementar e facilitar os mecanismos necesarios para regular as poboacións desta especie e reducir o posible impacto negativo que poida ocasionar sobre o medio ambiente e a agricultura, así como os efectos non desexados que poida ter sobre a sanidade animal, a saúde pública e a seguridade viaria.

 Publicidade

Preme para obter máis información.

Así, a conselleira lembroulles aos representantes da Federación Galega de Caza que ata o próximo 30 de xuño se axilizarán as autorizacións das medidas para o control e prevención de danos. No caso de días hábiles a solicitude deberá realizarse cunha antelación de 24 horas respecto á data na que se quere realizar a medida de control e de 48 horas se coincide cunha xornada inhábil

 PUBLICIDADE

Preme na imaxe para contactar con nós!

Entre as medidas de reforzo autorizables nos próximos catro meses -un dos períodos no que se concentran os danos nos cultivos-, inclúense accións paliativas tras danos e preventivas, sempre que se axusten ao marco normativo vixente. En concreto, poderán autorizarse de inmediato batidas (con armas ou na modalidade disuasoria), esperas, desencame de xabarís con cans atrelados e outras accións excepcionais en determinado tipo de terreos como a instalación de gaiolas trampa. No caso concreto destas gaiolas, a conselleira puxo en valor o seu bo resultado en áreas urbanas e periurbanas.