A Xunta comisa 11 quilos de troitas nun restaurante en Silleda por comercio ilegal

Ecos da Comarca/Silleda

Axentes ambientais da Unidade de investigación de conservación da natureza (UICON), dependente da Consellería de Medio Ambiente e Cambio Climático, localizaron a semana pasada unha partida de 11 quilogramos de troitas no marco do programa de detección de comercio ilegal de exemplares procedentes da pesca recreativa.

A intervención realizouse durante unha inspección a un restaurante de Silleda, que ofrecía as troitas para consumo dos seus clientes, a pesar de que a comercialización deste peixe está terminantemente prohibida. Os axentes decomisaron todos os exemplares, que posteriormente foron entregados a un centro benéfico.

 PUBLICIDADE

Preme para obter máis información.

A actuación enmárcase no plan operativo anual da UICON, unha nova brigada móbil integrada por oito axentes cunha alta capacitación técnica que puxo en marcha a Xunta este ano para abordar materias que, pola súa complexidade e carga de traballo, requiren de especial dedicación, coñecementos específicos e habilidades e competencias particulares, así como dunha coordinación e estratexia única en todo o territorio galego.

A lei 2/2021 de pesca continental de Galicia prohibe o comercio de calquera peixe procedente de pesca recreativa ou deportiva, ademais de cualificar esta infracción como moi grave, establecendo sancións con contías que oscilan dos 25.001 aos 150.000 euros.

 PUBLICIDADE

Preme na imaxe e contacta con nós!

Cómpre subliñar, ademais, que este tipo de actividades ilícitas producen unha grande afección sobre as poboacións de troita común presentes nos ríos galegos, xa que se trata dunha especie que forma parte do patrimonio natural da Comunidade.