A Xunta autoriza a contratación por máis de 55,6 M€ do helicóptero sanitario que cubrirá horario nocturno

O 061 contará cun novo helicóptero coa capacidade e tecnoloxía para atender enfermos de noite e en condicións meteorolóxicas adversas

Ecos da Comarca/Xeral

O Consello da Xunta autorizou o luns a contratación do servizo de transporte sanitario urxente aéreo da Fundación Pública Urxencias Sanitarias de Galicia-061 por un importe de 55,6 millóns de euros e un valor estimado de 66,8 millóns para os vindeiros oito anos.

Entre as novidades que incorporará o novo contrato destaca que fará posible que a sanidade pública galega conte, por primeira vez, cun helicóptero do 061 dispoñible en horario nocturno, que terá base en Santiago. Así, a previsión é que, tras un período de transición de 20 meses, a empresa adxudicataria incorpore unha aeronave con capacidade e tecnoloxía para atender enfermos tanto de noite coma en condicións meteorolóxicas adversas.

Ademais, o novo contrato de transporte sanitario urxente aéreo suporá un incremento das horas anuais de prestación do servizo. A Consellería de Sanidade abriu a finais do pasado ano un proceso de licitación do servizo de transporte sanitario urxente aéreo que tivo que ser declarado deserto tras presentarse unha única oferta que non resultou admitida.

O Consello da Xunta autoriza agora a apertura dun novo procedemento para a súa adxudicación coa previsión de que o servizo poida entrar en funcionamento con numerosas melloras no último trimestre deste ano. O servizo seguirá a estar coordinado pola Fundación Pública de Urxencias Sanitarias de Galicia-061, que durante o ano 2025 levou a cabo 820 mobilizacións das aeronaves, para dar unha resposta rápida e axeitada ás urxencias sanitarias na nosa Comunidade. No que vai de ano os recursos aéreos da sanidade pública galega rexistraron máis de 324 mobilizacións.

 PUBLICIDADE

Preme para obter máis información.

Estas cifras reflicten a importancia do transporte sanitario aéreo da Xunta, un servizo que constitúe un complemento de especial valor para o sistema sanitario público e para a atención integral dos pacientes. O transporte e a asistencia sanitaria aéreos inclúen o uso de dous helicópteros, con base en Santiago de Compostela e en Ourense, así como as tripulacións especializadas e a loxística necesaria para o seu desenvolvemento. Melloras cuantitativas e cualitativas O novo contrato do servizo de transporte sanitario urxente aéreo incluirá un conxunto de melloras de tipo cualitativo e cuantitativo.

Así, a incorporación dos voos nocturnos a partir do vixésimo primeiro mes de contrato suporá a ampliación do número de horas efectivas anuais deste servizo asistencial. Neste sentido, o helicóptero con base en Santiago de Compostela, unha vez cumprido ese prazo, verá estendida a súa actividade ao pasar do actual horario, de orto a ocaso, ata un servizo de 24 horas continuadas.

 PUBLICIDADE

Preme na imaxe e contacta con nós!

Pola súa banda, o helicóptero con base en Ourense contará cun servizo de atención continuada dun máximo de 12 horas. Entre as melloras de tipo cualitativo que prevé o novo contrato, unha vez finalizado o período de transición, inclúese o uso de aeronaves de maiores prestacións que as actuais, o que aumentará a seguridade e o confort das tripulacións e dos pacientes. Tamén prevé unha bolsa de horas que permita aumentar o número de horas efectivas de voo; a tramitación da certificación das helisuperficies que permita o seu uso, tanto diúrno coma nocturno; ou o uso de combustible ecolóxico, para favorecer o coidado do ambiente.

Ademais, o novo contrato incorpora melloras nas medidas de control da prestación deste servizo e en relación con posibles incumprimentos da operatividade das aeronaves. Establecerá un sistema de penalidades máis severo e proporcional que o actualmente vixente para garantir a mellor prestación do servizo sanitario urxente aéreo aos pacientes que o precisen.