A Plataforma Veciñal contra a Mina de Touro-O Pino recorrerá a autorización da nova liña eléctrica
Anuncia que interporá un recurso de alzada contra a recente Resolución da Dirección Xeral de Planificación Enerxética e Minas da Xunta pola que se outorgan as autorización para adaptar Portodemouros para a liña eléctrica da mina
Ecos da Comarca/Touro
A Plataforma Veciñal contra a Mina de Touro-O Pino anuncia que interporá un recurso de alzada contra a recente Resolución da Dirección Xeral de Planificación Enerxética e Minas da Xunta de Galicia, publicada este mércores 16 no Diario Oficial de Galicia (DOG n.o 176 https://www.xunta.gal/dog/Publicados/2026/20260916/AnuncioG0763-270826-0001_es.html), pola que se outorgan as autorización administrativas, previa e de construción, á empresa UFD Distribución Electricidad, S.A. para a adecuación da posición 603 na subestación de Portodemouros (Vila de Cruces).
A dita resolución administrativa admite de xeito explícito que a obra ten como finalidade a “conexión dunha nova liña eléctrica provinte da Mina de Touro”. Malia estar directamente vinculada ao polémico complexo industrial-mineiro, a Consellería de Economía e Industria tramitou esta actuación como un axuste técnico de distribución, eximíndoa tanto de Avaliación de Impacto Ambiental como do trámite de información pública ao abeiro da Lei 9/2021.
PUBLICIDADE
Fragmentación de proxectos e indefensión veciñal
Desde a Plataforma Veciñal denúnciase que esta tramitación supón unha clara estratexia de "fraccionamento do proxecto para eludir unha avaliación ambiental conxunta e rigorosa". A entidade veciñal sinala que non se pode illar a infraestrutura eléctrica do impacto global, sinérxico e acumulativo que a posta en marcha da actividade da Mina de Touro-O Pino tería sobre os recursos hídricos, a paisaxe e o medio de vida do territorio.
PUBLICIDADE
Así mesmo, a plataforma critica o bloqueo á participación cidadá ao acollerse á exención de información pública. "Esta práctica deixa na indefensión á veciñanza dos concellos afectados, que ve como se aproban infraestruturas enerxéticas destinadas á mina sen que se lles permita acceder ao expediente nin presentar alegacións coas debidas garantías ambientais e de participación".
Feitos consumados antes da resolución da mina
A Plataforma veciñal considera inadmisible que a Administración autonómica otorgue permisos e facilite infraestruturas de soporte para un proxecto mineiro aínda non autorizado e que conta cunha forte oposición social, ambiental e territorial. Trátase, a xuízo do colectvo, "dunha política de feitos consumados" que busca achandar o camiño á explotación mineira por partes".
PUBLICIDADE
Por todo isto, a Plataforma Veciñal contra a Mina de Touro-O Pino apurará o prazo dun mes para interpoñer o correspondente recurso de alzada ante a Consellería de Economía e Industria e solicita formalmente a suspensión e revisión da autorización outorgada.
Comentarios