A firma lalinense Inasus cumpre 55 anos "sendo unha industria forte, sostible e repartida polo territorio"

Ecos da Comarca/Lalín

O presidente da Xunta de Galicia, Alfonso Rueda, participou onte en Lalín na celebración do LV aniversario de Inasus, onde defendeu unha Galicia vertebrada, cunha industria forte, sostible e repartida por todo o territorio, como é o caso da empresa dezá.

Rueda aproveitou o acto para poñer en valor o peso do sector do metal na economía galega. Recordou que en 2024 o número de empregados neste ámbito aumentou un 3% ata superar os 60.000, e que a facturación medrou un 10% alcanzando os 18.500 millóns de euros, o 19% do PIB galego. Salientou ademais que detrás das cifras hai empresas como Inasus, que permiten que Galicia sexa recoñecida pola excelencia dos seus produtos nos mercados internacionais. 

O presidente garantiu que a Xunta seguirá acompañando ás entidades galegas a través da colaboración público-privada, imprescindible para o futuro industrial. Lembrou que o metalmecánico foi declarado sector estratéxico, e anunciou que nos próximos meses se presentará o plan director, elaborado en diálogo permanente cos axentes do sector. Este documento, explicou, será clave na nova estratexia industrial de Galicia, que busca ofrecer seguridade xurídica e apoio ás empresas, ademais de contar cun mapa detallado e actualizado do tecido produtivo e das súas necesidades.

Rueda referiuse tamén a un dos grandes retos da industria: a cobertura de vacantes e a falta de man de obra cualificada. Neste senso, destacou as medidas impulsadas pola Xunta, como a modernización do Servizo Público de Emprego, que permitiu ofrecer o perfil competencial de preto de 75.000 persoas en menos dun ano e medio; a aposta por unha formación máis flexible e adaptada ás necesidades reais das empresas; a colaboración cos clústeres e entidades sectoriais, que na última convocatoria permitiu formar a máis de 17.000 persoas; ou o programa Retorna Cualifica Emprego, que xa facilitou a contratación de máis de 320 galegos de 20 países en sectores estratéxicos.

 PUBLICIDADE

Preme na imaxe para obter máis información do evento.

Galicia Calidade

Destacou a traxectoria desta empresa familiar como un referente internacional no deseño, fabricación e execución de fachadas, e como un dos mellores expoñentes da marca Galicia no mundo.

O xefe do Executivo autonómico fixo referencia a todas as empresas galegas “que comezaron humildemente e agora son enormes”. Ademais subliñou que Inasus simboliza a combinación perfecta de raíces e modernidade, ao manter a esencia dunha empresa familiar que medrou con esforzo e constancia e, ao mesmo tempo, ao proxectarse internacionalmente coa innovación e a sustentabilidade como sinais de identidade. Subliñou que este é tamén o modelo que Galicia precisa para avanzar cara a unha industria forte, competitiva, respectuosa co entorno, aberta ao mundo e fondamente vencellada ao territorio, “unha Galicia vertebrada que precisa industrias fóra dos grandes núcleos de poboación”.

PUBLICIDADE

Preme na imaxe se queres contactar connosco.

O titular do Goberno galego subliñou que Inasus representa un modelo de crecemento sólido baseado na innovación, na sustentabilidade e no compromiso co territorio, cun equipo de máis de 200 traballadores que reflicte o espírito emprendedor do Deza.