A feira 'Fiando Vida' celébrase mañá, 28 de xuño, en Agolada e promove a sostibilidade
Ecos da Comarca/Agolada
Os Pendellos de Agolada encheranse de novo de vida mañá, sábado 28 de xuño, coa primeira edición da feira Fiando Vida. É o colectivo Agolada Viva da Plataforma Ulloa Viva quen organiza esta cita, a gran feira de moda sostible, vintage e de segunda man. "A través desta iniciativa queremos poñer enriba da mesa unha mensaxe clara: hai alternativas reais ao modelo de consumo e produción que representa o proxecto da macrocelulosa de Altri. A produción de lyocell a base de madeira de eucalipto, como a que
se proxecta en Palas de Rei, non é sostible, tal como denuncia a organización Canopy,
entidade de referencia internacional na certificación de sustentabilidade téxtil para máis de
950 marcas, incluíndo Inditex", sinala Agolada Viva.
E recalca que "detrás desa industria, agóchanse a destrución de ecosistemas, un consumo desmedido de auga e un modelo que perpetúa o fast fashion. FIANDO VIDA aposta pola moda con raíces, polo coidado do entorno e pola recuperación dos saberes e tecidos tradicionais galegos. Será unha xornada festiva, diversa e chea de vida", recalca. Contará con:
A benvida a cargo do actor Diego Anido, recoñecido polo seu compromiso cultural.
Máis de 60 postos de venda con roupa de segunda man, deseño sostible e vintage.
Música en directo coas actuacións de Zoelas, Davide Salvado, Señora DJ, Fransy e
Bico da Balouta.
Desfiles de moda sostible, con deseños de Karol Farias e María Viqueira.
Exposicións de téxtil tradicional galego, que celebran a nosa identidade e oficio.
Faladoiros con expertos/as como Martina Lubián, creadora de contido de moda
sostible, e a deseñadora Karol Farias.
Obradoiros participativos de costura, reciclaxe creativa, seda, impresión téxtil
botánica, e moito máis.
Cine ao aire libre pola noite, coa proxección do documental Paxaros Voando,
gañador dos Premios Mestre Mateo 2025, presentado por membros do equipo do
filme.
PROGRAMA DA XORNADA
Publicidade
PLANO DA DISTRIBUCIÓN DE POSTOS E ACTIVIDADES
Publicidade
PARTICIPANTES
"FIANDO VIDA é unha celebración, pero tamén unha chamada á acción colectiva. Queremos tecer un futuro sostible dende a nosa terra, coas nosas mans, e xunto ás nosas xentes. É tempo de dicir non a modelos extractivistas e si á vida, á cultura, á creatividade e á economía verdadeiramente circular", subliña Agolada Viva.
Comentarios