A Asociación Feiral Semana Verde de Silleda aproba un orzamento de 51.000 euros para o exercicio 2025
O colectivo celebrou unha xornada de convivencia aproveitando a súa asemblea xeral
Ecos da Comarca/Silleda
A Asociación Feiral Semana Verde de Silleda celebrou na tarde do luns a súa asemblea xeral anual, na que os socios e socias aprobaron un orzamento de 51.000 euros para o presente exercicio. Asemade, quedaron ratificadas as contas de 2024 con superávit. A reunión celebrouse nas instalacións do Museo do Campo e da Mecanización, trala visita ao
mesmo que a entidade organizou para o público xeral.
Un grupo de persoas, procedentes do municipio de Silleda e doutros limítrofes, participou
nunha visita guiada ao museo programada pola Asociación Feiral que preside José Luis
Rodríguez, actividade gratuíta e aberta á asistencia pública. Tralo percorrido, que durou
arredor de unha hora e media, a Asociación celebrou a súa asemblea xeral ordinaria, na que, ademais de aprobar os orzamentos para 2025, deu conta do informe de xestión do exercicio anterior.
Publicidade
O colectivo valorou moi positivamente a posta en marcha da primeira edición do concurso
sobre as feiras tradicionais galegas, que se fallou o mes pasado e que volverá convocarse no próximo curso. A renovación do contrato da súa queixería, a participación no salón Salimat, o mantemento da tenda con descontos para socios e a edición do seu boletín Cultura Rural son outras das iniciativas que a Asociación segue mantendo con moi bos resultados.
Publicidade
Ao remate da asemblea, socios e non socios puideron desfrutar duns petiscos ofrecidos pola Asociación, con produtos delicatesen e de proximidade que poden mercarse na súa tenda, que en horario de verán está aberta de 9:00 a 14:30 horas.
Comentarios