A Asociación Cultural e Veciñal Melidá recolle sinaturas para defender a presa de Don Antonio
- ecosdacomarca
- 20 jul
- 1 min de lectura
Ecos da Comarca/Melide
A Asociación Cultural e Veciñal Melidá vén de poñer en marcha unha campaña de recollida de sinaturas coa que busca frear o proxecto previsto na contorna da presa de Don Antonio, na praia fluvial de Furelos, e reclamar unha actuación que compatibilice a recuperación ambiental da zona coa conservación deste elemento patrimonial.
A través desta iniciativa, a entidade solicita, en primeiro lugar, o acceso con carácter urxente ao expediente ou proxecto da actuación, documentación que asegura ter solicitado ao Concello de Melide o pasado 10 de xullo.
PUBLICIDADE
Así mesmo, reclama a paralización do proxecto no caso de que este contemple a retirada parcial do muro de pedra da tosta, ao considerar que podería afectar a un ben de valor histórico para o municipio.
Como terceira petición, a asociación demanda a elaboración dun novo proxecto que dea resposta ás necesidades de limpeza e descontaminación da área fluvial, pero que, ao mesmo tempo, respecte e preserve a presa de Don Antonio como patrimonio do pobo de Melide.
PUBLICIDADE
O colectivo fai un chamamento á cidadanía para apoiar esta iniciativa mediante a súa sinatura e tamén difundindo a campaña nas redes sociais.
Segundo explica a asociación, a urxencia da mobilización débese a que as obras poderían comezar a partir do 1 de setembro, polo que consideran que o mes de agosto será decisivo para intentar evitar que se execute o proxecto tal e como está previsto.
NOTICIA RELACIONADA:
A Asociación Cultural e Veciñal Melidá alerta do “perigo de desaparición” da presa da praia de Furelos: https://www.ecosdacomarca.com/post/a-asociaci%C3%B3n-cultural-e-veci%C3%B1al-melid%C3%A1-alerta-do-perigo-de-desaparici%C3%B3n-da-presa-da-praia-de-furel
Comentarios