Aprazado o concerto de Xabier Díaz e As Adufeiras de Salitre que se ía celebrar mañá en Rodeiro

Laura Moure/Rodeiro

O programa Musigal, posto en marcha pola Deputación de Pontevedra para contribuír á difusión e promoción da música galega e en galego nos concellos da provincia, ía chegar este venres 28 de xullo ao concello de Rodeiro, onde estaba previsto a actuación Xabier Díaz e Adufeiras de Salitre, tal e como informou onte o ente provincial. Sen embargo, a actuación quedará aprazada debido á previsión de choiva.

Estaba previsto que en Rodeiro Xabier Díaz presentara en compañía das Adufeiras de Salitre o seu terceiro álbum conxunto, As Catedrais Silenciadas, que culmina un proceso que comezou no ano 2015 no que o elemento diferencial son o conxunto de mulleres vocalistas e percusionistas. Trátase dun álbum que actualiza diferentes tipos de formas musicais como pasodobres, xotas, alalás, ribeiranas ou muiñeiras, e foi galardoado co Premio Martín Codax na categoría de Música Tradicional no 2020. Ademais figurou tres meses consecutivos no Top Ten do World Music Charts Europe e tivo entrada na sección Top of the World da prestixiosa revista Songlines, na que os editores escollen os 10 mellores discos de cada mes en todo o mundo.

Publicidade

Preme na imaxe para obter máis información do evento.

Cunha traxectoria de case 40 anos na música, Xabier Díaz (A Coruña, 1969) tamén atesoura unha intensa actividade docente, en asociacións e certames. Formou parte de Berrogüetto entre 2008 e 2014 e, paralelamente, participou xunto a Guadi Galego, Xosé Lois Romero e Guillerme Fernández no proxecto aCadaCantos.

Preme na imaxe se queres contactar connosco.

As composicións de Xabier Díaz, en moitos casos, parten do traballo de investigación, escoitando as cancións das mulleres no rural e dándolles o seu estilo. Ten recibido numerosos premios polo seu traballo, como o da Música Independente ao mellor álbum en galego en 2016, e actuado en numerosos países de Europa, África e América.