Volve o programa de excursións 'Coñece o teu país' co que o Concello de Arzúa ofrece catro saídas

Betanzos, Ribadeo, Catoira e a cidade de Ourense son os destinos elexidos nesta edición na que se ofrecen 440 prazas de balde

Laura Moure/Arzúa

O Departamento de Cultura do Concello de Arzúa organiza unha nova edición do programa de excursións Coñece o teu país. A iniciativa regresa con catro novas visitas a diferentes lugares da xeografía galega ao longo dos meses estivais, de xuño a setembro, de maneira totalmente gratuíta.

A primeira delas será o vindeiro sábado día 28 de xuño á provincia da Coruña. A viaxe será á localidade de Betanzos na que se realizará unha visita guiada á zona histórica da vila e ao próximo Pazo de Mariñán cuxas orixes se sitúan a mediados do século XV. O Pazo e os seus xardíns son conxunto histórico-artístico e monumental dende o ano 1972. A Deputación da Coruña promoveu as obras de reconstrución e ampliación e na actualidade ten tres usos: actos institucionais, centro de cursos e museo do propio Pazo, reunindo boa parte da colección artística da Deputación.

Publicidade

Preme na imaxe para obter máis información do evento.

A segunda excursión correspondente á provincia de Lugo que se celebra en xullo, será o día 26. Nesta ocasión o destino elexido será o municipio de Ribadeo. As dúas restantes serán o sábado 30 de agosto a Catoira e, xa para rematar por este ano, realizarase unha saída á cidade de Ourense o sábado 27 de setembro.

Segundo se indica dende o Departamento de Cultura, todas as persoas interesadas en participar no programa deberán inscribirse na Oficina de Cultura e Deportes, podendo anotar como máximo a un acompañante por cada solicitante. As prazas dispoñibles iranse cubrindo por orde de inscrición, sendo as mesmas limitadas.

Publicidade

Preme na imaxe se queres contactar connosco.

Todas aquelas persoas que desexen apuntarse á primeira viaxe organizada para o vindeiro 28 de xuño a Betanzos, poden facelo completamente de balde a partir deste venres, 20 de xuño, entre as 8:30 e as 14:00 horas na Oficina de Cultura e Deportes situada no edificio sociocultural María Mariño, na rúa Padre Pardo nº 33, no 1º andar (ao carón de Radio Arzúa).