Vinte finalistas aspiran aos Premios Youtubeiras+ 2024, entre elas unha de Melide e outra de Monterroso

O palmarés coñecerase na gala final, que se vai celebrar o 1 de febreiro no Pazo da Cultura de Narón, conducida por Meiga-i e con música do grupo De Ninghures

Laura Moure/Xeral

Os Premios Youtubeiras+ anunciaron onte en Narón as canles e persoas finalistas do certame, que, na súa oitava edición e co lema 'Fachenda ao cadrado', abriu a participación aos contidos difundidos na plataforma TikTok. Son vinte as propostas aspirantes a levar o galardón nalgunha das sete categorías do concurso, cuxo palmarés coñecerase na gala final que se vai celebrar o 1 de febreiro, ás 19 horas, no Pazo da Cultura de Narón, conducida por Meiga-i e con música do grupo De Ninghures.

Na rolda de prensa de presentación participaron a titular de Igualdade, Lingua e Dereitos Civís da Deputación da Coruña, Sol Agra; a alcaldesa de Narón, Marián Ferreiro, e Meiga-i.

89 canles —49 de YouTube e 40 de TikTok— presentáronse este ano aos premios dun proxecto que aposta por fomentar a creación de contidos dixitais en galego e promover e darlles visibilidade aos diferentes perfís de persoas xeradoras de contidos na Rede. A iniciativa ten o apoio dos servizos de normalización lingüística da Deputación da Coruña, dos concellos de Ames, Carballo, Ferrol, Moaña, Narón, Oleiros, Pontevedra, Rois, Santiago de Compostela e Teo, e das universidades da Coruña, Santiago de Compostela e Vigo.

"Estes premios", sinalou Sol Agra na súa intervención, "caracterizáronse sempre pola colaboración institucional e a implicación de diferentes entidades locais a través dos seus servizos de normalización lingüística, así coma das tres universidades". "Cremos", engadiu, "que a unión, a colaboración e a forza común ao redor da lingua son o camiño que cómpre seguirmos para acadar a normalización".

Narón únese ao proxecto Youtubeiras+ e faino, segundo Marián Ferreiro, "da mellor forma posible, acollendo a gala de entrega de premios, para amosar o noso compromiso coa lingua nun ámbito, o das redes sociais e a creación de contidos en Internet, que consideramos fundamental para o presente e para o futuro de calquera idioma". "A creación de contidos en galego en plataformas como YouTube e TikTok constitúe unha vía imprescindible para a difusión do galego entre as novas xeracións".

Meiga-i encargouse de descubrir algúns detalles da gala, na que actuará o grupo De Ninghures. "Non será un musical, pero terá moita música; tampouco será un cabaré, pero teremos moito de cabaré nunha noite con dous grandes leitmotivs: o primeiro, o propio lema desta edición, 'Fachenda ao cadrado'; e o segundo, a historia de Internet". "Youtubeiras+", dixo, "xa ten oito anos, xa ten unha historia e percorreremos a historia de Internet ao longo de toda a gala a través de homenaxes aos formatos nativos da Rede".

Premios

Youtubeiras+ rexistrou este ano a inscrición de 89 canles —polos 68 da edición anterior—, ue emitiron vídeos que suman 19.720 minutos de contidos dixitais en galego". O certame repartirá 7.500 euros en premios entre as sete categorías a concurso: 1.250 euros para cada unha das propostas gañadoras de YouTube e de TikTok, e 1.000 euros para as que acaden os galardóns de Creación de Contidos, Revelación, Calidade Lingüística e Rede, ademais do Premio do Público, para o que votaron 5.056 persoas a través da web de Youtubeiras, www.youtubeiras.gal.

Finalistas

CANLE DE YOUTUBE

• Exécito Mekemeke (Ames)

• IagoRAW (Lugo)

• O Faiado Podcast (Santiago de Compostela)

CANLE DE TIKTOK

• Sara Seco Rial (Santiago de Compostela)

• pradorua (Ourense)

• Konachadas (Ames)

CREACIÓN DE CONTIDOS

• Rodri Míguez (Bueu)

• Prado Rúa (Ourense)

• Anxo Sánchez (Lugo)

REVELACIÓN

• Arquivo Anab (Xinzo de Limia)

• Carlota Casal Ramos (Melide)

• Galiactiva (Ourense)

Publicidade    

Preme na imaxe se queres contactar connosco.

CALIDADE LINGÜÍSTICA

• A Debate no Eirado (Santiago de Compostela)

• Galego para Peques (Monterroso)

• Luís do Río (Santiago de Compostela)

REDE

• OU ké! (Ourense)

• Pablo Rodríguez Vila (Lugo)

• Rebelico (Vigo)

PREMIO DO PÚBLICO

• A revolución galega de 1846, de Orgullo Galego (Vigo)

• Non máis bágoas, de Xurxo Varela (Chantada)

• Queimas controladas, de Savia Nova (Pontevedra)

• 
  

O xurado dos Youtubeiras+ 2024 formárono Andrea Villa, xornalista; Carlos Callón, profesor e escritor; Mónica Valencia, técnica de Normalización Lingüística do Concello de Ourense; Sara Varela, guionista, e Iago Gordillo, realizador audiovisual e gañador do Premio Youtubeira 2023.A asistencia á gala é de balde e as entradas pódense reservar na billeteira do Pazo da Cultura de Narón, no teléfono 981 102 897 —de luns a sábado, de 9:30 a 14 horas e de 17:30 a 20:30— ou no correo electrónico taquilla.pazo@naron.gal.