Vila de Cruces organiza o domingo unha observación para coñecer de preto o Sol cun telescopio solar

Estará dirixida polo astrónomo Eduardo Ojero e os monitores starlight Begoña Estévez e Antón Pazos, de proxecto Corvus Maris de divulgación astronómica

Laura Moure/Vila de Cruces

O Concello de Vila de Cruces organizará o vindeiro domingo, 19 de xullo, unha observación do Sol cun telescopio solar e outros instrumentos na Praza do Concello de 11:30 a 13:30 horas. A actividade, gratuíta e dirixida a todas as idades, estará impartida polo astrónomo valisoletano Eduardo Ojero, afincado en Piloño, e os monitores starlight Begoña Estévez e Antón Pazos, do proxecto Corvus Maris de divulgación astronómica.

A sesión ten como obxecto observar e coñecer o Sol a través do telescopio solar Acuter. Os participantes poderán mirar ao Sol cun filtro nunha lonxitude de onda (cor) que é predominante na parte externa do Sol, chamada HAlfa. O resultado do visionado é unha imaxe da superficie solar con todos os seus detalles, manchas e protuberancias. “Es una imagen preciosa del Sol, de colar naranja y rosado”, explica Ojero.

 PUBLICIDADE

Preme na imaxe para obter máis información deste evento.

O telescopio solar terá acoplada unha cámara no ocular que permitirá proxectar a imaxe nunha pantalla led pata que todos os asistentes poidan ver o Sol comodamente. Ademais deste telescopio solar, Corvus Maris traerá consigo uns prismáticos solares. Ao mesmo tempo, Ojero utilizará unha caixa estenopeica para observar o Sol a modo de cámara escura.

Finalmente, a actividade pecharase cun recordatorio do gran evento astronómico do 12 de agosto, o eclipse total solar que se poderá ver en Vila de Cruces, cun evento organizado polo Concello de Vila de Cruces, con observación guiada por Ojero desde O Alto da Madanela. Eduardo Ojero lembrará as medidas de protección, as gafas de eclipse, indicadas para observalo, e tamén a posterior observación das Perseidas, tamén o 12 de agosto no antigo campo de fútbol de Piloño a partir da media noite. Máis información destes eventos astronómicos do 12 de agosto en Cruces:

https://divulgacion.trioeclipses.es/eventos.

 PUBLICIDADE

Preme na imaxe para obter máis información deste evento.

Eduardo Ojero Pascual (Valladolid, 1954) ten unha extensa carreira como astrónomo, traballou no Observatorio de Calar Alto, en Serra Nevada, e no Centro de Astronomía

Espacial da Agencia Espacial Europea, en Villanueva de la Cañada en Madrid, e actualmente é membro da Sociedade Galega de Astrónomos. Actualmente, xa xubilado, reside na parroquia cruceña de Piloño.