Transfiren a prol do Concello de Cruces o treito da antiga Ponte de San Xusto e doutros tramos

En concreto a Xunta aproba a transferencia do treito antigo de 298 metros da EP-6402 Portodemouros-Ponte San Xusto, así como dous treitos da EP-6306 Agolada–As Cruces e da EP-6403 As Cruces–Brocos, de 345 metros e 73 metros de lonxitude, respectivamente

Laura Moure/Vila de Cruces

O Consello da Xunta aprobou este xoves o decreto polo que se aproba o cambio de titularidade a prol do Concello de Vila de Cruces do treito da antiga ponte de San Xusto da estrada EP-6402, así como de dous treitos das estradas EP-6306 Agolada-As Cruces e da EP-6403 As Cruces-Brocos. A Deputación Provincial de Pontevedra acordou en pleno aprobar a transferencia da titularidade destes viarios a prol da entidade local, segundo se establecía no convenio de colaboración asinado co Concello de Vila de Cruces, de mellora da mobilidade peonil na EP-6306 Agolada-As Cruces.

Trazado do treito antigo da EP-6402 Portodemouros-Ponte de San Xusto.

A Axencia Galega de Infraestruturas, vistos os informes emitidos polos servizos competentes, formulou a proposta favorable á transferencia de titularidade do treito antigo de 298 metros de lonxitude da EP-6402 Portodemouros-Ponte de San Xusto, da antiga ponte de San Xusto, con inicio no quilómetro 1+670. Ademais, informou favorablemente do cambio de titularidade do treito final de 345 metros de lonxitude da estrada provincial EP-6306 Agolada–As Cruces, desde o quilómetro 16+688 ata o 17+033; así como do treito inicial de 73 metros de lonxitude da EP-6403 As Cruces–Brocos, desde o quilómetro 0 ata o 0+073.

Publicidade

Preme na imaxe se queres obter máis información do evento.

A transferencia a prol do Concello de Vila de Cruces tramítase de acordo co previsto na Lei 8/2013, do 28 de xuño, de estradas de Galicia, que establece a súa aprobación por decreto da Xunta, a proposta da Consellería de Infraestruturas e Mobilidade como competente en materia de estradas, e logo do acordo entre as administracións implicadas.

O departamento de Infraestruturas da Xunta ten entre as súas funcións a tramitación dos cambios de titularidade das estradas incluídas nas redes dependentes da comunidade autónoma e das entidades provinciais e locais. Co cambio de titularidade, o Concello de Vila de Cruces terá a competencia para actuar nestes treitos e asume a responsabilidade da súa conservación e mantemento.

Publicidade

Preme na imaxe se queres contactar connosco.

O decreto aprobado onte polo Executivo autonómico producirá efectos desde o día seguinte ao da súa publicación no Diario Oficial de Galicia.