Touro recepciona un traballo que afonda na existencia dunha variante histórica do Camiño

Trátase dun vial que une a parroquia de Burres en Arzúa con Arca no Pino, e que cruza por lugares do concello de Touro como Forte, Oca de abaixo, Laña de abaixo ou Quión

Ecos da Comarca/Touro

O alcalde de Touro, Roberto Castro, xunto con membros do equipo de Goberno do Concello de Touro puideron recepcionar e valorar o traballo realizado pola firma Edicón Consultores que fixeron para estudar as posibilidades de que unha variante do Camiño Francés de Santiago que atravesa o Concello sexa oficializada como tal. No estudo refrendado por historiadores, faise fincapé en numerosos vestixios históricos, xeográficos e toponímicos que reflexan a existencia desta nova vía e o seu emprego por parte dos peregrinos para variar a súa ruta sobre todo nos meses fríos, buscando por este desvío do Camiño orixinal unha orografía máis apta para o camiñante antes as inclemencias invernais.

Esta variante iniciaríase na parroquia de Burres en Arzúa e voltaría a entroncar no Camiño Francés na localidade de Arca en O Pino, tendo importantes tramos no Concello de Touro. Vestixios como numerosas capelas asociadas ao Cabildo de Santiago, toponimia referente a lugares de paso de arrieiros, a existencia de fontes auga de abastecemento, ou romarías asociadas a santorais vinculados ao camiño, son algúns dos vestixios existentes aínda na actualidade, e destacase sobre todo o feito de que entre a súa toponimia existen referencias a San Sadurdiño (San Saturnino de Tolosa) reverenciado na Francia precursora do Camiño Compostelá, e mesmo a existencia do lugar de O Cebreiro ao igual que a localidade que da entrada ao Camiño en Galicia.

Publicidade

Preme na imaxe para obter máis información.

Nesta mostra foron estudados documentos do arquivos históricos, e fíxose unha gran pescuda na “Carta Xeométrica” de Galicia de Domingo Fontán do século XIX, e dos apuntes da zona do Catastro do Marques da Ensenada do século XVIII. Neles púidose ver a importancia desta ruta histórica empregada por arrieiros e camiñantes con entronques no Camiño Francés, e variantes de desprazamento cara a zonas da Ulla, unha ruta que en numerosas ocasións se fai coincidente con posibles calzadas romanas (das cales aínda existe empedrado). O Estudo indica que esta variante ben puidera ser un cruce vital de camiños que unía as Terras do Deza, Lugo e as correspondentes ao control do Cabildo de Compostela.

O alcalde de Touro, Roberto Castro, indicou a importancia deste estudo que demostra a existencia dunha ruta empregada polos camiñantes e peregrinos e que ben puidera ser obxecto dun traballo de delimitación e demarcación que rematará logo dos trámites oportunos no recoñecemento oficial da variante.

Publicidade

Preme na imaxe se queres contactar connosco.

Castro indica que este traballo debería ser o inicio dunha estratexia de traballo que fora na liña de acadar o recoñecemento de variante do Camiño Francés, ou cando menos de Ruta Xacobea a esta vía, aspecto que podería ser vital para a potenciar o desenvolvemento económico do territorio. O rexedor define este traballo como “o primeiro paso importante” para poñer a historia de Touro no seu sitio, que non é outro que un concello de gran importancia para aqueles que tiñan a tumba do Apóstolo Santiago como meta.