Silleda súmase polo Día Mundial sen Alcohol a unha campaña para previr o consumo en menores

Difundiranse cartaces entre os locais de hostalería e establecementos de venda

Laura Moure/Silleda

Con motivo do Día Mundial sen Alcohol, que se conmemora o 15 de novembro, o Concello de Silleda apoia a iniciativa de prevención do consumo de alcohol en menores de idade

promovida polo Grupo de Traballo para a Prevención do Consumo de Alcohol, no que participan todas as comunidades e cidades autónomas e que está coordinado polo Ministerio de Sanidade.

O obxectivo principal desta iniciativa é sensibilizar sobre a importancia de evitar a venda de bebidas alcohólicas a persoas menores de idade, reducindo así o consumo de alcohol e os danos asociados. Estes danos non só afectan ás nenas, nenos e adolescentes, senón tamén ás súas familias, ao seu entorno máis próximo e ao conxunto da sociedade e da economía.

A colaboración das entidades locais é un piar fundamental para xerar contornos máis seguros, protectores e saudables para a infancia e a adolescencia. Por este motivo, desde o Concello de Silleda promoveranse e facilitaranse accións concretas nos comercios e establecementos do municipio onde se venden bebidas alcohólicas.

Publicidade

Preme na imaxe se quere contactar connosco.

Así, colocaranse carteis oficiais da campaña en puntos visibles dos locais, para reforzar a mensaxe de prevención e responsabilidade. Tamén nos establecementos debe figurar o recordo da obriga legal de non vender nin dispensar alcohol a menores de idade e a recomendación de esixir identificación cando exista dúbida sobre a idade da persoa

compradora.

O Concello de Silleda fai un chamamento á colaboración de todo o tecido comercial e hostaleiro, así como das familias, centros educativos e entidades sociais, para que se impliquen nesta campaña e contribúan a protexer a saúde e o benestar da mocidade.