Silleda informa das restriccións de tráfico en distintas rúas durante a fin de semana debido ao Rallysprint

Colocará avisos nas zonas afectadas, tal e como se acordou onte na xuntanza de seguridade para a proba, que terá lugar este sábado 16

Laura Moure/Silleda

O Concello de Silleda colocará nas próximas horas carteis nos que se informará das restricións de circulación e estacionamento con motivo da celebración do III Rallysprint Concello de Silleda, que se celebrará o vindeiro sábado 16. Estas medidas afectarán a varias rúas: Camiño do Castro, (onde se situará o reagrupamento e o parque pechado); e a rúa Recinto Feiral e Rúa Arturo Pérez Lázara (parque de traballo xunto co aparcamento da Semana Verde).

 PUBLICIDADE

Se queres obter máis información do evento preme na imaxe.

No caso da rúa Camiño do Castro, quedará pechada ao tráfico xa o xoves dende as 18:00 e estará prohibido estacionar dende as 15:00 horas. Nas rúas Arturo Pérez Lázara, Recinto Feiral e no estacionamento da Semana Verde, non se poderá estacionar nin circular dende o venres ás 16:00 horas. O tráfico quedará pechado tamén dende o venres á tarde, se ben terán acceso aos garaxes, (entrando pola dirección prohibida) as persoas residentes.

Rúa Cartaxena e Condes do Deza

Tamén o venres pola mañá se cortará o acceso á rúa Cartaxena dende Alonso Ríos (modificarase o sentido da rúa Castrelo), pola montaxe para as verificacións técnicas. Así mesmo, na rúa Condes do Deza, quedará restrinxido o estacionamento o sábado na marxe dereita, podendo acceder só persoas residentes. O acceso ao parking público será a través da rúa Morón.

 PUBLICIDADE

Preme para obter máis información.

Restriccións na zona de Bandeira e de Escuadro

Así mesmo, dende a organización xa se enviaron comunicacións a todas as vivendas das zonas por onde pasará o Rallysprint, con dous tramos: na zona de Bandeira e de Escuadro informando dos horarios de pasada e os cortes dos viarios afectados.

Na reunión de seguridade de onte participaron membros de Escudería Silleda, que organiza esta proba por terceiro ano consecutivo con récord de pilotos, o xefe da Policía Local, representantes da Garda Civil de Tráfico, a alcaldesa, Paula Fernández, o xefe de seguridade da proba e a concelleira de Deportes.

Dende a Escudería Silleda e o Concello agradécese a colaboración nesta proba dos corpos de seguridade, dos Bombeiros de Deza e Tabeirós, e as agrupacións de voluntarios. Tamén se agradece a comprensión da veciñanza á hora de respectar os cortes de tráfico.