Silleda Fai celebrará a 2ª edición o 26 de setembro abrindo a participación a produtores de fóra
O certame volverá apostar pola artesanía, a alimentación de proximidade e os produtos de elaboración propia
Laura Moure/Silleda
O Concello de Silleda xa prepara a segunda edición de Silleda Fai, o certame nacido o pasado ano co obxectivo de dar visibilidade ao talento, á creatividade e ao traballo de produtores e artesáns. A nova cita celebrarase o sábado 26 de setembro e chegará cunha importante novidade: a participación abrirase nesta ocasión tamén a produtores e
produtoras de fóra do municipio de Silleda.
Tras a boa acollida da primeira edición, celebrada en outubro de 2025, o Concello aposta por dar continuidade a unha iniciativa que busca converterse nun escaparate para produtos artesanais, propostas de alimentación de proximidade, creacións propias e outras iniciativas vinculadas á produción local e ao pequeno emprendemento.
A apertura do certame a expositores doutros municipios permitirá ampliar e diversificar a oferta, mantendo ao mesmo tempo a filosofía coa que naceu Silleda Fai: promover o consumo responsable, favorecer a relación directa entre produtores e público e crear un espazo de encontro arredor da artesanía, da creatividade e dos produtos de calidade.
PUBLICIDADE
As persoas, empresas ou entidades interesadas en participar poderán formalizar a súa solicitude contactando co Concello de Silleda, no 986 580000.
Outra das novidades desta segunda edición será o reforzo da vertente participativa do certame. Así ofertaránse obradoiros artesanais, que se incorporarán á programación da xornada, ao igual que degustacións de produtos.
PUBLICIDADE
“Despois da experiencia do pasado ano queremos seguir facendo medrar Silleda Fai, ampliando a participación e enriquecendo a oferta, pero conservando a esencia coa que naceu: poñer en valor a creación, o pequeno produtor e os produtos feitos con identidade e con historia”, sinala a concelleira de Promoción Económica e Axenda 2030, Estefanía Taín.
Desde o Concello animan a produtores, artesáns e iniciativas interesadas a sumarse a esta segunda convocatoria, da que nas vindeiras semanas se irán dando a coñecer novos detalles relativos á programación e ás actividades previstas.
Comentarios