Silleda estrea zonas “Bica e Arranca” para mellorar a a fluidez nos accesos aos centros educativos

Permitirán realizar paradas breves para deixar ou recoller aos nenos e nenas de maneira segura, evitando estacionamentos prolongados nas horas punta e favorecendo unha maior rotación de vehículos

Laura Moure/Silleda

O Concello de Silleda vén de poñer en marcha novas zonas “Bica e Arranca” nas inmediacións dos centros educativos, unha medida pensada para facilitar a entrada e saída do alumnado, mellorar a seguridade viaria e ordenar o tráfico nos momentos de maior afluencia.

Estes espazos permitirán realizar paradas breves para deixar ou recoller aos nenos e nenas de maneira segura, evitando estacionamentos prolongados nas horas punta e favorecendo unha maior rotación de vehículos. Ao longo do día poderase estacionar nestas zonas con normalidade, agás nas franxas horarias indicadas na sinalización, nas que só estará permitida a parada durante o tempo imprescindible para que o alumnado baixe ou suba con seguridade á beirarrúa.

Nas dúas zonas habilitadas xunto ao CEIP Plurilíngüe de Silleda (na rúa Recinto Feiral) e xunto ao Colexio María Inmaculada, na rúa Maria Colmeiro, estará prohibido estacionar de luns a venres en horario de 08:30 a 09:10 e de 13:30 a 14:10, reservando estes dous espazos para a entrada e saída dos centros.

 PUBLICIDADE

Se queres obter máis información do evento preme na imaxe.

Deste xeito, o Concello busca que o servizo poida ser utilizado polo maior número posible de familias, reducindo os tempos de espera e contribuíndo a desconxestionar os accesos aos centros educativos. A actuación incluíu a instalación da correspondente sinalización vertical e horizontal, así como lonas identificativas que facilitarán a visibilidade das novas zonas.

A alcaldesa, Paula Fernández Pena, que hoxe visitou as zonas habilitadas xunto á concelleira de Educación, Ángela Troitiño, subliña que se trata dunha medida “sinxela, práctica e pensada para o día a día das familias”, ao tempo que apela á colaboración cidadá para garantir o bo funcionamento destes espazos. “O obxectivo é gañar seguridade, fluidez e comodidade nos accesos aos colexios”, sinala.

 PUBLICIDADE

Preme para obter máis información.

O Concello lembra que o éxito desta iniciativa dependerá do uso responsable das zonas “Bica e Arranca”, respetando os horarios sinalizados e evitando ocupalas máis tempo do necesario.