Silleda e Culinaria asinan un convenio para reforzar a atención alimentaria a familias vulnerables

A colaboración enmárcase no programa Silleda Solidaria e permitirá a doazón e reparto de menús elaborados a persoas e unidades familiares derivadas polos Servizos Sociais

Laura Moure/Silleda

O Concello de Silleda vén de asinar un convenio de colaboración coa empresa Culinaria para desenvolver un servizo de reparto alimentario dentro do programa Silleda Solidaria, co obxectivo de reforzar a cobertura das necesidades básicas de alimentación de persoas e familias do municipio en situación de vulnerabilidade.

O acordo foi asinado pola alcaldesa de Silleda, Paula Fernández Pena, e polo director da empresa Culinaria, Manuel Araújo Prado, formalizando así unha colaboración de marcado carácter social que permitirá ofrecer menús ou pratos individuais gratuítos a familias en situación de necesidade, sempre previa valoración e derivación por parte dos Servizos Sociais comunitarios municipais.

A través deste convenio, Culinaria comprométese á doazón dos menús ou pratos individuais, elaborados conforme a criterios de alimentación saudable e equilibrada e cumprindo coa normativa sanitaria e hixiénico-alimentaria vixente. Pola súa banda, o Concello asumirá o custo do reparto, fixado en 0,25 euros por menú, cun importe anual máximo de 2.600 euros con cargo á aplicación orzamentaria correspondente ás axudas de emerxencia social.

A alcaldesa, Paula Fernández, destacou que este convenio “é un novo exemplo da importancia da colaboración entre o Concello e o tecido empresarial local para dar resposta ás necesidades da veciñanza”. Neste sentido, agradeceu “a implicación e sensibilidade social de Culinaria, que se suma ao programa Silleda Solidaria cunha achega moi valiosa para apoiar ás persoas e familias que atravesan situacións máis difíciles”.

Fernández lembrou que “a atención ás necesidades básicas é unha prioridade para este goberno municipal” e subliñou que o obxectivo é “seguir reforzando os recursos dispoñibles dende os Servizos Sociais, especialmente nos casos nos que é precisa unha resposta rápida, coordinada e eficaz”.

 PUBLICIDADE

Se queres obter máis información do evento preme na imaxe.

Derivación dende Servizos Sociais

As persoas beneficiarias serán aquelas residentes no municipio que, tras a correspondente valoración técnica dos Servizos Sociais municipais, se atopen en situación ou risco de exclusión social e presenten necesidades alimentarias básicas non cubertas.

O procedemento de funcionamento artellarase mediante unha comunicación directa e coordinada entre o Concello e Culinaria. As profesionais dos Servizos Sociais serán as encargadas de seleccionar ás persoas ou unidades familiares beneficiarias, tramitar as altas e baixas no programa e facer o seguimento técnico de cada caso.

O convenio terá unha vixencia inicial dun ano dende a súa sinatura, coa posibilidade de prórroga se ambas partes así o acordan e sempre que se manteñan as razóns de interese público que motivaron a súa formalización.

Ademais, crearase unha comisión mixta de seguimento, integrada por representantes do Concello, dos Servizos Sociais e da empresa colaboradora, para supervisar o correcto desenvolvemento do programa, avaliar incidencias e propoñer melloras operativas se fose necesario.

Esta nova colaboración intégrase no marco de Silleda Solidaria, o programa municipal orientado a artellar medidas de apoio social e de resposta ás situacións de emerxencia ou vulnerabilidade, reforzando a rede de atención ás persoas que máis o precisan no municipio.

 PUBLICIDADE

Preme para obter máis información.

A alcaldesa, Paula Fernández, que estivo acompañada da concelleira de Benestar, Ángela Troitiño, na sinatura, destacou que este convenio “permite reforzar a capacidade de resposta dos Servizos Sociais municipais ante situacións de vulnerabilidade, garantindo unha atención máis áxil e directa nunha cuestión tan básica como é a alimentación”.

Fernández agradeceu especialmente “a sensibilidade e implicación de Culinaria, unha empresa asentada en Silleda que demostra con este acordo o seu compromiso co municipio e coas persoas que máis o precisan”. A rexedora sinalou ademais que “Silleda Solidaria nace precisamente para sumar vontades, recursos e colaboracións que nos permitan estar máis preto da veciñanza en momentos difíciles”. “Este convenio é un bo exemplo de como a colaboración público-privada pode traducirse en medidas concretas, útiles e con impacto real nas familias”, engadiu.

Paula Fernández incidiu tamén en que “todas as derivacións realizaranse sempre con criterio técnico, dende a confidencialidade e o rigor dos Servizos Sociais municipais, para garantir que a axuda chegue a quen realmente a precisa”.