Silleda continúa coas tarefas de mantemento e posta a punto dos centros educativos de cara ao novo curso

Persoal municipal acomete estes días distintas actuacións na Escola Infantil A Galiña Azul e nos CEIP Plurilingüe de Silleda e Ramón de Valenzuela da Bandeira

Laura Moure/Silleda

O Concello de Silleda continúa durante estas semanas coas tarefas de mantemento, conservación e posta a punto dos centros educativos públicos do municipio, aproveitando o período estival para acometer distintas actuacións antes do inicio do novo curso escolar. Os traballos céntranse estes días na Escola Infantil A Galiña Azul, no CEIP Plurilingüe de Silleda e no CEIP Ramón de Valenzuela da Bandeira, con intervencións de diversa índole que están a ser realizadas por persoal municipal.

A concelleira de Educación e Benestar, Ángela Troitiño, visitou onte as instalacións da Galiña Azul para comprobar a evolución dos traballos. Neste centro estanse levando a cabo tarefas de limpeza e acondicionamento do patio interior, incluíndo a limpeza do pavimento de caucho e da pérgola corredeira, así como a reposición de area e a revisión e barnizado das madeiras dos xogos infantís. Tamén se están repintando zonas afectadas por humidades en varias aulas e colocando elementos de suxeición no patio exterior para a futura instalación de telas de sombra.

As actuacións na escola infantil inclúen ademais diversas reparacións de fontanería nos baños e billas das instalacións, así como a revisión das escaleiras dos cambiadores das aulas e outras pequenas melloras en zonas como a cociña.

 PUBLICIDADE

Preme na imaxe para obter máis información deste evento.

“Trátase de aproveitar estas semanas para realizar todas aquelas tarefas de conservación e pequenas reparacións que son necesarias para que as instalacións estean nas mellores condicións posibles cando comece o curso”, explica Ángela Troitiño, que destaca o traballo do persoal municipal.

No CEIP Plurilingüe de Silleda están previstas ou en execución actuacións como a limpeza dos canalóns e a retirada de vexetación no tellado da zona de Infantil, a reposición de area no patio infantil e a limpeza do pavimento de caucho e das mesas exteriores. Tamén se levarán a cabo reparacións no comedor, coa colocación de azulexos e plaquetas, e instalarase unha reixa de ventilación na porta do almacén do pavillón.

Pola súa banda, no CEIP Ramón de Valenzuela da Bandeira realizaranse labores de limpeza de canalóns e desbroce na zona do Coto da Gaiteira. Entre as actuacións previstas figura tamén o arranxo dos xogos infantís do patio, a reparación de buratos no pavimento de caucho, o barnizado das estruturas de madeira e o repintado dos xogos marcados no chan.

 PUBLICIDADE

Preme na imaxe para contactar connosco.

A concelleira sinala que “son actuacións que, aínda que ás veces pasan máis desapercibidas, resultan fundamentais para conservar adecuadamente os edificios e espazos educativos e, sobre todo, para garantir contornas seguras e agradables para o alumnado e para o persoal dos centros”.

Desde o Concello de Silleda continuarase durante os vindeiros días con estas tarefas de mantemento e acondicionamento, coordinando as actuacións coas necesidades trasladadas polos propios centros educativos e priorizando aquelas intervencións necesarias de cara ao inicio do curso.