Silleda acollerá o vindeiro xoves 26 unha xornada sobre as traídas de auga veciñais

Está organizada no marco do programa provincial “Coidamos a túa auga”

Laura Moure/Silleda

O Concello de Silleda anima ás comunidades de usuarios de auga do municipio a participar na xornada informativa sobre as traídas de auga veciñais en Galicia que se celebrará o vindeiro xoves 26 de marzo, ás 20:30 horas, no salón de actos da Casa do Concello.

A cita enmárcase no programa provincial “Coidamos a túa auga”, centrado na mellora da xestión da auga no ámbito rural a través do apoio, o asesoramento e a posta en valor das comunidades de usuarios. A sesión estará impartida por técnicos de Rodespi. Durante a xornada abordaranse cuestións de grande interese para as traídas veciñais, como o Plan Sanitario da Auga (PSA), o control da calidade da auga e a toma de mostras, o mantemento das instalacións, as obrigas legais e a documentación das comunidades, así como o acceso ás liñas de subvención +NOVAQUA e +AQUA 2026.

 Publicidade

Preme para obter máis información.

O encontro servirá tamén para resolver dúbidas e analizar casos reais, ofrecendo información práctica e útil para o día a día das comunidades. Dende o Concello de Silleda faise un chamamento á participación, dada a importancia deste tipo de redes no abastecemento de auga en moitas parroquias e no conxunto do rural. A sesión preséntase como unha boa oportunidade para coñecer novidades normativas, mellorar a xestión das instalacións e aclarar cuestións técnicas e administrativas que afectan ás comunidades de usuarios.

Esta iniciativa forma parte dunha acción máis ampla impulsada pola Deputación de Pontevedra para reforzar a xestión sustentable da auga no rural. De feito, a institución provincial xa deu a coñecer este programa como complemento ao Plan +Aqua, cun proxecto específico para apoiar e poñer en valor as comunidades de usuarios de auga da provincia.

 PUBLICIDADE

Preme na imaxe para contactar con nós!

Ademais, a programación xa se está a desenvolver noutros municipios pontevedreses, con xornadas celebradas noutros municipios. O goberno municipal destaca a conveniencia de que as comunidades de auga de Silleda asistan a esta reunión para coñecer de primeira man recursos, obrigas e posibilidades de apoio, nun momento no que a boa xestión da auga resulta fundamental tanto para garantir a calidade do servizo como para facilitar a adaptación ás esixencias legais e técnicas actuais.