Silleda acollerá o obradoiro “Activa-das”, sobre empoderamento das mulleres con discapacidade

As inscricións e solicitudes de información poden realizarse no Concello

Laura Moure/Silleda

O Concello de Silleda, a través do departamento de Igualdade e o Centro de Información á Muller (CIM), acollerá nos vindeiros días 3, 5 e 7 de novembro o obradoiro “Activa-das: Claves para o apoderamento das mulleres con discapacidade”, unha iniciativa organizada pola Asociación de Mulleres con Discapacidade de Galicia (ACADAR).

O programa, que se desenvolverá na Casa da Xuventude (Rúa Trasdeza, 90), entre as 10:00 e as 13:00 horas, forma parte das accións de sensibilización e formación que promove ACADAR en toda Galicia, co obxectivo de impulsar o empoderamento das mulleres con discapacidade e fomentar a súa participación plena na sociedade.

A entidade traballa en ámbitos como a igualdade, a educación, a saúde, a sexualidade e o acompañamento a mulleres en situación de violencia, reivindicando os dereitos das mulleres con discapacidade e visibilizando as súas realidades.

O obradoiro “Activa-das” inclúe tres sesións formativas con contidos prácticos e participativos, abordando cuestións como a autoestima, habilidades sociais e resolución de conflitos, ou a Sensibilización sobre as violencias cara ás mulleres con discapacidade nas TICs

 PUBLICIDADE

Preme na imaxe para obter máis información do evento.

As inscricións e solicitudes de información poden realizarse no Concello de Silleda, (Rúa Progreso, 41), chamando ao 986 592 037 ou a través do correo electrónico cim@silleda.es.

PUBLICIDADE

Preme na imaxe se queres contactar connosco.

Desde o Concello de Silleda destácase a importancia de apoiar e visibilizar este tipo de iniciativas que contribúen a promover a igualdade, a autonomía persoal e o benestar das mulleres con discapacidade, reforzando a colaboración entre administracións e entidades sociais.