Silleda abordará o venres a modificación puntual do regulamento do Viveiro de Empresas

O obxectivo é flexibilizar o seu uso

Laura Moure/Silleda

O goberno municipal levará ao pleno ordinario deste venres unha proposta para iniciar a modificación puntual dos artigos X e XI do Regulamento de Réxime Interior do Viveiro de Empresas do Concello de Silleda, co obxectivo de adaptar o seu funcionamento á realidade actual e optimizar o aproveitamento dos espazos dispoñibles. Segundo se recolle na proposta que se someterá á consideración da Corporación, a experiencia acumulada no funcionamento desta infraestrutura municipal e a evolución das necesidades das persoas usuarias fan aconsellable introducir determinados cambios para dotar de maior flexibilidade ao seu réxime de uso, mantendo en todo caso a prioridade para os proxectos empresariais de nova creación.

Entre as principais novidades que se propoñen figura a posibilidade de que, de maneira excepcional e sempre que existan espazos dispoñibles, poidan acceder ao viveiro empresas ou persoas traballadoras autónomas xa constituídas sen límite de antigüidade, quedando esta ocupación supeditada en todo momento á preferencia dos proxectos emprendedores e das empresas cunha antigüidade máxima de dous anos.

A modificación tamén contempla permitir a continuidade provisional das empresas que superen o prazo máximo de permanencia no viveiro, sempre que non exista demanda doutros proxectos que cumpran cos requisitos de acceso.

 Publicidade

Preme para obter máis información.

Neste sentido, establécese ademais un sistema de prioridade para a liberación dos despachos cando haxa novas solicitudes admitidas e non existan espazos libres. Para elo, poderase ter en conta o grao de uso efectivo do espazo asignado, priorizando a permanencia daquelas empresas que acrediten unha maior utilización e actividade nas instalacións.

No caso de producirse novas solicitudes e non haber despachos dispoñibles, a proposta fixa unha orde de prioridade para a liberación dos espazos, comezando polas empresas ou persoas autónomas que non acrediten un uso efectivo do despacho, seguindo polas que non teñan a consideración de proxecto de nova creación e, en terceiro lugar, polas que superasen o prazo máximo de permanencia establecido no regulamento.

 PUBLICIDADE

Preme na imaxe para contactar con nós!

O acordo que se elevará ao pleno inclúe tamén a apertura dun trámite de consulta pública previa, mediante publicación na sede electrónica e na páxina web municipal, co fin de recoller a opinión da cidadanía e das organizacións potencialmente afectadas respecto desta modificación normativa.

O Viveiro de Empresas do Concello de Silleda, situado no parque empresarial Área 33, constitúe unha infraestrutura municipal orientada a favorecer a creación, arranque e consolidación de novas iniciativas empresariais, facilitando espazos e servizos que contribúan ao desenvolvemento do tecido económico local. O regulamento vixente xa incorpora, ademais, a recente habilitación de novos espazos, como un novo despacho individual e unha sala de coworking, co fin de dar resposta ao incremento da demanda. Para a dotación de mobiliario no espazo de coworking, o Concello de Silleda ten xa solicitada unha subvención a fin de optimizar recursos.