Sanidade pon en marcha desde o vindeiro día 30 a vacinación en grandes recintos

Citarase en primeiro lugar á poboación con idade entre 70 e 79 anos e a profesionais do ámbito sanitario e sociosanitario que non foran vacinados ata o de agora

Laura Moure/Xeral

A Consellería de Sanidade porá en marcha, a partir do vindeiro dia 30, a través da súa Dirección Xeral de Saúde Pública, a vacinación fronte á gripe e a covid-19 en grandes recintos. O departamento sanitario galego citará, en primeiro lugar, á poboación con idade entre 70 e 79 anos, o que supón ao redor de 292.000 persoas a convocar. Agárdase acadar, polo menos, a mesma cobertura do ano pasado, que foi do 75 % no caso da gripe e algo menor no que respecta á covid.

Tamén nos primeiros días serán convocados profesionais do ámbito sanitario e sociosanitario que non foran vacinados ata o de agora, que son ao redor de 25.000 persoas.

Solicitude autocita vacinación VRS

Xunto ao anterior, a Consellería de Sanidade subliña que xa se pode pedir autocita para que os nenos e nenas se poidan inmunizar fronte ao virus respiratorio sincitial nos centros de saúde a partir do 4 de novembro e ata finais dese mes. Con esta medida, o departamento sanitario galego pretende recaptar aos nenos e nenas que non se inmunizaron nos hospitais, que agora poderán facelo no seu centro de saúde de cabeceira, sempre que pertenzan a un grupo da campaña.

Publicidade

Preme na imaxe para obter máis información.

A medida está dirixida a nenos e nenas sen factores de risco nados na campaña, é dicir, os que vaian nacendo dende o 23 de setembro de 2024 ata o 31 de marzo de 2025. Tamén vacinarase aos nados con anterioridade ao inicio da campaña, dende o 1 de abril de 2024.

Horarios de vacinación nos grandes recintos

Respecto da vacinación fronte á gripe e a covid nos grandes recintos, que comeza o vindeiro día 30, no seguinte cadro pódense ver os lugares e horarios de vacinación en cada área sanitaria: https://www.xunta.gal/notas-de-prensa/-/nova/006679/conselleria-sanidade-pon-marcha-desde-vindeiro-dia-30-vacinacion-grandes-recintos

Publicidade

Preme na imaxe se queres contactar connosco.

Outros grupos de poboación

A vacinación das persoas de 80 e máis anos continúa nos centros de saúde de cabeceira e, nos próximos días, comezarase a repescar ás que aínda non se vacinaron. A piques de rematar nesta semana a primeira convocatoria deste grupo de poboación, os niveis de cobertura acadados xa son do 66,5 % no caso da gripe, e do 62 % no caso da covid.

No caso da poboación infantil de 6 meses-59 meses, tamén continúa a vacinación nos centros de saúde, sendo o nivel de cobertura acadado ata o de agora un 31,5 %, moi superior ao nivel acadado na mesma semana da campaña anterior. Sanidade remarca que toda a información sobre a campaña está dispoñible na páxina web da Consellería de Sanidade https://gripe.sergas.es/

Ademais este ano, a Dirección Xeral de Saúde Pública, a través do Observatorio de Saúde Pública de Galicia, pon a disposición de toda a cidadanía os datos de cobertura de vacinación de gripe e covid cunha actualización diaria.