A Aedeza distinguirá o día 14 na X Xuntanza a socios como Faro de Vigo e a Residencia das Dores

Os outros sete galardóns recaeron en Engineering Rinosteel, Cornova, Tawi Momentos, Ana Blanco Centro Óptico, María Hermida Ferro, Restaurante Cabanas e Librería Raíces

Laura Moure/Deza

A Asociación de Empresari@s de Deza (AEDEZA) celebrará o sábado 14 de novembro no Pazo de Bendoiro, a partir das 20:00 horas, a décima edición da tradicional Xuntanza Empresarial, na que entregará un total de nove galardóns, entre os que destacan o Premio Especial Aedeza ao xornal Faro de Vigo e o Premio á traxectoria empresarial á Residencia Nosa Señora das Dores.

No caso do Premio Especial, a xunta directiva acordou concederllo ao xornal decano da prensa española por cumprir, precisamente onte (o martes), 173 anos de actividade xornalística e por levar 25 anos como afiliado da Aedeza e dedicando boa parte do seu labor informativo á bisbarra. No caso da Residencia Nosa Señora das Dores, os directivos destacaron o “importante labor social que presta na atención ás persoas maiores” desde o centro de Lalín.

 PUBLICIDADE

Os demais premios outorgados pola xunta directiva da Aedeza recaeron na firma lalinense Tawi Momentos, dedicada ao deseño de espazos e de mobiliario e escenografía para eventos (Premio ao fomento do galego na empresa); no comercio lalinense Ana Blanco Centro Óptico (Premio ao emprendemento); na empresa Engineering Rinosteel (Premio á internacionalización), afincada en Rodeiro e que acometeu proxectos de estruturas metálicas en 17 países; a firma silledense Cornova, dedicada ao tratamento e depuración de augas residuais (Premio á innovación); o Restaurante Cabanas de Lalín, que tamén vén de ser distinguido co Premio da Cociña Galega ao mellor cocido de Galicia (Premio da Hostalaría); Librería Raíces (Premio do Comercio), por tratarse dunha das librarías emblemáticas e senlleiras de Lalín; e María Hermida Ferro (Premio aos autónomos), como impulsora do laboratorio especializado en análises agrícolas Rock River Laboratory Spain, situado no Parque Empresarial Lalín 2000.

 PUBLICIDADE

Preme na imaxe para contactar connosco.

Nesta décima edición, a Xuntanza Empresarial comezará ás 20.00 horas no Pazo de Bendoiro e, ademais da entrega de premios, incluirá a tradicional cea. Todos os asociados que desexen acudir poderán retirar as invitacións na propia asociación desde hoxe e ata o vindeiro día 12 de novembro cun prezo de 50 euros por persoa.