Rodeiro presenta o “Tour Cambote”, unha iniciativa para descubrir as catro provincias de Galicia

A primeira saída será o mércores 22 de xullo e xa están abertas as inscricións

Laura Moure/Rodeiro

O Concello de Rodeiro, a través da Concellería de Traballo, pon en marcha unha nova proposta destinada a fomentar o lecer activo, a convivencia e o coñecemento do patrimonio galego. Trátase do “Tour Cambote: Descubrindo as catro provincias de Galicia”, unha iniciativa impulsada pola concelleira Begoña Vázquez, que permitirá á veciñanza realizar diferentes excursións ao longo do ano para coñecer os lugares máis emblemáticos de cada unha das provincias galegas.

Este novo programa nace coa intención de ofrecer alternativas de ocio accesibles e de calidade, favorecendo a participación social e creando espazos de encontro entre a veciñanza. Ao mesmo tempo, busca poñer en valor a riqueza paisaxística, cultural, histórica e gastronómica de Galicia, promovendo un turismo de proximidade e o orgullo polo patrimonio propio.

A primeira parada deste percorrido será a provincia da Coruña, cunha visita á espectacular Costa Ártabra, unha das zonas costeiras máis singulares de Galicia, caracterizada polos seus impresionantes cantís, vilas mariñeiras e espazos naturais de gran beleza.

 PUBLICIDADE

Preme na imaxe para obter máis información deste evento.

A excursión celebrarase o mércores 22 de xullo, con saída ás 8:00 horas desde Rodeiro e regreso previsto ás 22:00 horas. Ao longo da xornada, as persoas participantes percorrerán algúns dos lugares máis representativos desta comarca, nunha viaxe que combinará cultura, tradición, natureza e tempo para desfrutar do entorno.

O itinerario inclúe unha primeira parada en Cedeira, unha vila mariñeira que conserva toda a esencia das Rías Altas e que permitirá descubrir o seu ambiente portuario e o seu estreito vínculo co mar.

Posteriormente, o grupo desprazarase ata San Andrés de Teixido, un dos santuarios máis coñecidos de Galicia e lugar de grande importancia histórica e espiritual. A visita permitirá coñecer as súas tradicións e lendas populares, entre elas o coñecido dito de “Vai de morto quen non foi de vivo”, profundamente arraigado na cultura galega.

A seguinte parada será en Cabo Ortegal, un dos puntos xeográficos máis emblemáticos da comunidade, onde se unen o océano Atlántico e o mar Cantábrico. As persoas asistentes poderán contemplar unhas das panorámicas costeiras máis impresionantes de Galicia e coñecer a importancia xeolóxica e ambiental deste espazo natural.

A xornada finalizará cun paseo por Cariño, unha vila mariñeira que destaca polo seu porto pesqueiro, o seu encanto tradicional e a tranquilidade das súas rúas, converténdose no broche perfecto para unha intensa xornada de descubrimento.

 PUBLICIDADE

Preme na imaxe para obter máis información do evento.

Segundo destaca a concelleira Begoña Vázquez, impulsora desta iniciativa, “queremos achegar Galicia á nosa veciñanza, ofrecendo actividades que combinen lecer, cultura e convivencia. Moitas veces viaxamos lonxe para descubrir lugares espectaculares cando na nosa propia terra contamos cun patrimonio natural, histórico e humano excepcional. Este Tour Cambote pretende precisamente iso: coñecer mellor Galicia, desfrutala e compartila entre todos.”

A responsable municipal tamén salienta que este proxecto forma parte da aposta do Concello por desenvolver actividades que promovan un envellecemento activo, a participación cidadá e a dinamización social do municipio, favorecendo ademais a creación de novas relacións entre os participantes.

O prezo da excursión será de 20 euros, unha cantidade pensada para facilitar a participación do maior número posible de persoas e facer accesible unha actividade que inclúe unha completa xornada de viaxe e convivencia.

As inscricións xa están abertas e poderán realizarse ata o día 20 de xullo, incluído, no Concello de Rodeiro ou na Biblioteca Municipal, así como a través dos teléfonos 986 79 00 09 e 986 79 03 01, onde tamén se facilitará toda a información necesaria ás persoas interesadas.

 PUBLICIDADE

Preme na imaxe para obter máis información deste evento.

Esta primeira saída supón o inicio dun proxecto máis amplo co que o Concello de Rodeiro pretende percorrer as catro provincias galegas, descubrindo ao longo dos próximos meses algúns dos seus espazos naturais, monumentos, vilas e tradicións máis representativas.

Con esta iniciativa, promovida por Begoña Vázquez desde a Concellería de Urbanismo, Traballo e Servizos Sociais, o Concello reafirma o seu compromiso coa organización de actividades que melloren a calidade de vida da veciñanza, fomenten a participación social e contribúan a divulgar a extraordinaria riqueza cultural e paisaxística de Galicia.