Os traballos foron realizados nas últimas semanas a través da convocatoria da Axencia Galega de Turismo para o embelecemento no Camiño de Santiago
Laura Moure/Silleda
As obras de mellora tramo do Camiño de Santiago ao seu paso pola parroquia de Taboada, cunha serie de actuacións para a conservación, protección e embelecemento do tramo de calzada que segue á ponte románica sobre o río Deza están xa rematadas. Os traballos comezaron en días pasados, logo de obter os pertinentes permisos sectoriais e a autorización da Dirección Xeral de Patrimonio, ca restauración manual da pedra fundacional da Ponte.
A actuación, cun investimento de 19. 511,25 euros realizáronse a través das axudas da Consellería de Turismo para actuacións de mellora paisaxística e de embelecemento de bens e recursos que se atopen no Camiño, e con fondos municipais. Por este tramo discorre o Camiño do Sudeste (coñecido tamén como Vía da Prata) e o Camiño de Inverno, nun dos puntos máis fermosos da ruta a Compostela ao seu paso polo municipio silledense.
Con esta actuación, o Concello de Silleda quere continuar mellorando a conservación do Camiño e a súa contorna para poñer en valor o patrimonio histórico, cultural e natural. As accións propostas son respetousas co desenvolvemento e conservación do patrimonio a través do embelecemento, acondicionamento e protección do Camiño. Así, retiráronse as actuais pías de cemento na fonte da contorna (que se sustituiron por outras de granito), e mellorouse e limpouse todo o entorno.
Ademais, debido á falta de mantemento, as escorrentías de auga estaban xa afectando a traza nesta zona, polo que se buscou restituir os cursos orixinais das augas, comenzando por limpar a canles laterais que estaban atoadas.
A actuación
A intervención no Camiño consistiu en traballos de roza e limpeza manual, e a drenaxe das augas que discorren polo camiño á canle da beira esquerda (baixando cara ao río Deza) en varios puntos. Estes traballos, tal e como figura na memoria da intervención, foron
sometidos a control arqueolóxico e as canalizacións foron soterradas recuperando os cachotes que conforman o propio camiño, varios deles fóra do seu sitio. Tamén se recolocaron e asentaron algunhas das pedras dos laterais que se atopaban soltas.
O alcalde, Manuel Cuiña, e a concelleira de Cultura e Turismo, Mónica González, visitaron a zona dos traballos cos que se continúa poñendo en valor o Camiño ao seu paso por Silleda, nun dos puntos máis fermosos do trazado, xunto á emblemática Ponte Taboada. Ademais de limpar a pedra, a cargo de dúas restauradoras, onde se atopa a inscrición fundacional (do ano 912) tamén se colocou un pequeno panel informativo (revisado por unha paleógrafa e unha licenciada en Filoloxía Clásica) á beira ca reproducción exacta do seu contido.
Comentarios