Preto de 150 nenos asisten á gran festa do deporte na clausura das Escolas Deportivas Municipais do Pino

O Pavillón de Reboredo reuniu a alumnado, familias e monitores nunha xornada de exhibicións e recoñecemento ao esforzo realizado durante o curso

Laura Moure/O Pino

O deporte base volveu demostrar a súa fortaleza no Concello do Pino coa celebración da gala de clausura das Escolas Deportivas Municipais 2025-2026, unha cita que reuniu este venres, 5 de xuño, no Pavillón de Reboredo a preto de 150 nenos e nenas de entre 4 e 16 anos, acompañados polas súas familias, monitores e representantes municipais.

A xornada converteuse nunha auténtica festa do deporte, na que os participantes tiveron a

oportunidade de amosar diante do público parte do traballo desenvolvido ao longo dos últimos meses nas distintas disciplinas ofertadas polo Concello.

Durante a tarde sucedéronse as exhibicións de psicomotricidade, multideporte, fútbol sala,

ximnasia rítmica, baile moderno, patinaxe e bádminton, enchendo a pista de movemento,

ilusión e talento. Cada actuación puxo de manifesto non só a evolución técnica dos rapaces e rapazas, senón tamén valores fundamentais como o compañeirismo, a constancia, o respecto e o traballo en equipo. A clausura incluíu tamén a tradicional entrega de medallas e obsequios aos participantes.

 PUBLICIDADE

Preme para obter máis información.

O alcalde do Pino, Manuel Taboada, o concelleiro de Deportes, Borja Castro, e o de Emprego e Obras, José Fuentes, fixeron entrega dos recoñecementos aos nenos e nenas das distintas disciplinas deportivas. Como lembranza desta edición, todos os participantes recibiron unha medalla, unha gorra e unha botella de auga reutilizable, en agradecemento pola súa implicación e constancia ao longo do curso.

Desde o Concello do Pino destacan a excelente resposta que teñen cada ano as Escolas Deportivas Municipais, convertidas nunha ferramenta fundamental para fomentar hábitos

saudables, promover a práctica deportiva desde idades temperás e favorecer a socialización da infancia e da mocidade do municipio.

 PUBLICIDADE

Preme na imaxe e contacta con nós!

A clausura puxo o broche final a un curso marcado pola alta participación e polo entusiasmo dos máis novos, consolidando as Escolas Deportivas Municipais como un dos programas con maior seguimento entre as familias do concello.

Co remate desta edición, o Concello xa traballa na preparación dunha nova tempada para

seguir ofrecendo aos nenos e nenas do Pino espazos de formación, convivencia e crecemento persoal a través do deporte.