Preocupación polo risco de escorrentías e filtracións na antiga mina de Touro-O Pino debido as choivas

A plataforma veciñal Contra a Mina de Touro-O Pino  presentou sendos escritos ao Director Xeral de Planificación Enerxética e Minas e á Conselleira de Medioambiente e Cambio Climático e Presidenta de Augas de Galicia

Ecos da Comarca/Touro/O Pino

Este luns 9 de febreiro, a plataforma veciñal Contra a Mina de Touro-O Pino presentou sendos escritos ao Director Xeral de Planificación Enerxética e Minas e á Conselleira de Medioambiente e Cambio Climático e Presidenta de Augas de Galicia, amosando a preocupación da veciñanza pola afección que os fenómenos meteoróloxicos, cada vez máis agresivos consecuencia do cambio climático, poidan ter sobre as balsas de residuos mineiros e sobre os antiguos ocos mineiros inundados con augas contaminadas.

Rotura de contención dunha balsa na antiga mina de Monte Neme hai uns días. Fonte: Concello de Carballo.

A plataforma indica que ante a choiva persistente que está a causar alto estrés hídrico en diversas zonas de Galicia, así como en moitos pobos de boa parte de España, e ao coñecerse os verquidos contaminantes producidos na antiga mina de volframio de Monte Neme tras o colapso dunha balsa mineira, "veciños e veciñas de Touro e O Pino están a manifestar unha preocupación crecente polo perigo de que unha situación semellante poida acontecer na antiga mina de cobre de Touro".

 Publicidade

Preme na imaxe para obter máis información do evento.

Abonda, apunta a asociación, "na inquedanza o feito de que, en circunstancias de normalidade, seguen a producirse escorrentías de augas de contacto do territorio mineiro, aos ríos e regueiros da contorna que rematan no Ulla, debido a que nunca se realizou a pertinente restauración do espazo danado polo mina, a pesares de que o esixe a Lei. As condicións meteorolóxicas cada vez máis agresivas, que se prevé cada vez máis extremas no futuro debido ao cambio climático, abren a posibilidade a situacións impensables en escenarios climáticos normais. Na nosa contorna a existencia balsas de estériles e ocos mineiros inundados de augas contaminadas e hiperacedas, sen condicións de seguridade adecuadas e sen un Plan de Restauración obrigatorio, son unha ameaza moi seria para a saúde das persoas e da facenda dos labregos e gandeiros desta comarcas que atinxe tamén a bacía do Ulla e a Ría de Arousa".

 Publicidade/DOAZÓN PARA ECOS DA COMARCA

Fai unha doazón para axudar ao xornalistmo independente. Gracias!

É necesario, recalca, "que a Administración faga o seu papel protexendo ás persoas e ao Medio ambiente, que faga cumprir as leis ás empresas igual que o fai coa cidadanía. A veciñanza de Touro e O Pino levamos moito tempo reclamando solucións e instando ao goberno da Xunta a tomar decisións tendo en conta o principio de precaución. Non queremos que os nosos fillos e fillas vivan con medo na súa propia casa. Se agora estamos preocupados polas consecuencias do temporal de choiva nas instalacións da vella mina, é difícil imaxinar como estariamos de terse levado a cabo o proxecto mineiro agora en trámite, que pretende construír un depósito de estériles de 80 metros de altura

e 3 quilómetros de lonxitude, almacenado lodos tóxicos no seu interior e na súa superficie. Cando ademais se fía a seguridade das instalacións ao espesado deses lodos, que por moito que se depositen cun grao de humidade baixo, nunhas condicións de precipitacións como as que estamos vivindo é imposible de mantelo, o que eleva o risco de colapso e rotura destas instalacións".

Publicidade

Preme para contactar con nós e pregunta polas tarifas que son unha bicoca!

Ante esta situación, a Plataforma Veciñal contra a Mina de Touro-O Pino dirixiu sendos escritos ao Director Xeral de Planificación Enerxética e Minas e á Conselleira de Medioambiente e Cambio Climático e Presidenta de Augas de Galicia, demandando as seguintes medidas:

1.- A inspección técnica, oficial e inmediata, da actual situación das instalacións e arredores da antiga mina de cobre de Touro.

2.- O requirimento conseguinte á empresa concesionaria do cumprimento das súas obrigas de restauración e conservación, en condicións de seguridade, das actuais instalacións, evitando totalmente filtracións e escorrenơas contaminantes.

3.- A verificación de que non existan puntos de vertido ao dominio público hidráulico mais alá do autorizado no Proxecto de Drenaxe refundido e a comprobación de que as augas industriais que se están a verter son todas depuradas, incluso na situación de estrés hídrico actual

4.- A monitorización constante da situación das citadas instalacións

5.- A información transparente a esta Plataforma Veciñal, aos concellos de Touro e O Pino e á opinión publica das medidas tomadas e dos resultados obtidos.