Pedro Blanco subliña o compromiso do Goberno coa vertebración do interior de Galicia ao presentar a recta final da autovía A54 entre Lugo e Santiago

Laura Moure/Palas de Rei

O delegado do Goberno en Galicia, Pedro Blanco, supervisou a pasada semana en Palas de Rei as obras de execución do viaduto sobre o río Pambre, dentro do tramo Palas de Rei - Melide da autovía A-54 entre Lugo e Santiago. O delegado estivo acompañado polo presidente da Comisión de Transportes do Congreso dos Deputados, José Ramón Gómez Besteiro.

O viaduto sobre o río Pambre permitirá o paso da autovía A-54 sobre o río Pambre, salvando un val de gran beleza natural e de gran riqueza patrimonial e etnográfica. O viaduto resólvese cun único taboleiro para ambas as calzadas, composto por un total de 16 vans.

Publicidade

Preme na imaxe para obter máis información!

O delegado remarcou a complexidade técnica deste elemento, do que se comeza agora a construción do van central, de 87 metros de lonxitude. E avanzou que o do Pambre converterase no viaduto máis longo na rede de estradas da provincia de Lugo, con preto dun quilómetro de lonxitude.

Publicidade

Preme na imaxe para obter máis información.

Pedro Blanco subliñou o compromiso do Goberno de Pedro Sánchez coa finalización desta vía de alta capacidade, que vertebrará a partir do próximo ano o interior de Galicia e permitirá reducir á metade o tempo de desprazamento actual entre Lugo e Santiago de Compostela.

Publicidade

Preme na imaxe se quere contactar connosco.

O Ministerio de Transportes está actualmente traballando nos dous últimos tramos de 28 quilómetros e un investimento conxunto de máis de 192 millóns de euros. A nova autovía A-54 permitirá ademais mellorar de forma definitiva, a seguridade viaria da actual N-547, tanto rodada como peonil, onde actualmente hai importantes tránsitos de peregrinos do Camiño de Santiago.