Pedro Blanco pon en valor en Silleda os 11,4M€ cos que o Goberno garantiza a convocatoria do Bono Aluguer Xove

Reclámalle á Xunta que estea á altura deste compromiso do Goberno co acceso da mocidade a unha vivenda e que complemente o orzamento transferido con fondos propios, do mesmo xeito que outras comunidades

Laura Moure/Silleda

O delegado do Goberno en Galicia, Pedro Blanco, remarcou hoxe a aposta do Goberno para reverter “a taxa de emancipación máis baixa da historia en Galicia” con medidas de apoio ao alugueiro e de acceso á vivenda entre a mocidade e exemplificou este apoio nos 11,4 millóns de euros da segunda convocatoria do Bono Alugueiro Novo, que aprobou a semana pasada o Consello de Ministros. Nunha visita institucional ao Concello de Silleda, o delegado presentou este acordo, que eleva ata os 34,2 millóns de euros a partida que o Goberno destina a Galicia para desenvolver o Bono Alugueiro Xove, “unha achega sen precedentes”, insistiu.

O delegado lembrou que a axuda ao alugueiro para mozos foi deseñada e posta en marcha polo Goberno de Pedro Sánchez e forma parte “dun amplo conxunto que temos en marcha para converter a vivenda nun auténtico dereito real e non nun problema”. Unha medida imprescindible en Galicia, apuntou, onde “dúas de cada tres persoas menores de 35 anos aínda vive cos seus pais”. Con respecto á nova convocatoria destas axudas, o delegado reclamou á Xunta que estea á altura do compromiso do Goberno para atallar esta emerxencia social e que complete con fondos propios o orzamento que recibe do Ministerio.

Pedro Blanco mostrouse convencido de que a “Xunta será coherente coas súas mensaxes permanentes de compromiso coa vivenda e completará estes fondos”, pois “non o fixo a vez anterior e deixaron a miles de galegos sen unha axuda á que tiñan dereito”, remarcou. Na semana en que o Goberno galego iniciou o trámite dos orzamentos para o ano 2025, o delegado mostrou a confianza en que as futuras contas inclúan esta achega autonómica, que permitirían que, do mesmo xeito que pasa noutras comunidades que apostaron por completar con fondos propios este programa, todos os mozos e mozas de Galicia que teñan dereito a esta axuda poidan acceder a ela.

Publicidade

Preme na imaxe se queres contactar connosco.

Pedro Blanco subliñou que “a vivenda é unha política de Estado” e en consecuencia, está acompañada dun orzamento que non ten precedentes na historia e que require da implicación das comunidades autónomas para que chegue á cidadanía. “O noso compromiso é claro: destinamos máis recursos que nunca para garantir o acceso a unha vivenda digna e alcanzable”, insistiu o delegado. Nesta liña, pediu á Xunta lealdade na execución destas transferencias pois son estes fondos estatais os que posibilitan a materialización dos anuncios que o Goberno galego está a facer nesta materia.

Reunión en Trasdeza

En Silleda, o delegado repasou as liñas do Goberno coa alcaldesa, Paula Fernández, quen tamén forma parte da Comisión de Vivenda e Axenda Urbana no Congreso dos Deputados. Nesta reunión, na que estivo tamén o subdelegado do Goberno na provincia de Pontevedra, Abel Losada, coincidiron na necesidade de consolidar a vivenda como quinto piar do Estado de Benestar con políticas públicas que axuden a fixar poboación en concellos pequenos.

O delegado puxo a Silleda como espello doutros concellos polo seu dinamismo e expansión desde o corazón do rural de Galicia.