Os socialistas de Melide José Prado e Chus Iglesias dimiten como membros do equipo do goberno actual
Ademais, o candidato non asumirá a acta de concelleiro, que lle correspondería como consecuencia das eleccións municipais celebradas o 28 de maio de 2023
Laura Moure/Melide
A agrupación local do PSdeG-PSOE de Melide e membros da candidatura, mantiveron no día de onte unha reunión como consecuencia das eleccións municipais celebradas o recente 28 de maio e acordaron: O PSdeG-PSOE de Melide abre un proceso de reflexión interno para valorar a situación e garante o apoio incondicional ao candidato de Adiante Melide á Alcaldía de Melide o vindeiro 17 de xuño.
O comunicado íntegro de José Prado:
Na reunión que mantiveron os membros da agrupación local do PSdeG-PSOE de Melide e membros da candidatura, comuniquei que non asumirei a acta de concelleiro, que me correspondería como consecuencia das eleccións municipais celebradas o 28 de maio de 2023.
Así mesmo, con data de 31 de maio de 2023, ao igual que a miña compañeira Chus Iglesias, presentei a dimisión como membro do equipo de goberno actual, coa conseguinte renuncia ás competencias inherentes ao cargo de Tenente Alcalde, conservando unicamente a condición de Concelleiro do Grupo Municipal Socialista ata a constitución da nova Corporación Municipal.
Manifesto o meu máis cordial agradecemento a todos os militantes socialistas, a todos e todas as persoas que me acompañaron en candidaturas municipais, e a todos os votantes que nos apoiaron. Quero resaltar a miña satisfacción polo traballo desenrolado xunto co a miña compañeira Chus Iglesias, primeiro na oposición (2015-2019) e despois no Goberno de Melide (2019-2023), xa que en ambos períodos, contribuímos a mellorar Melide e sendo tamén decisivos para evitar que o PP gobernase no pobo.
Comentarios