O V Work Cocido consolídase como un punto de conexión entre talento, ideas e vivencias

Celebrouse onte en Lalín

Laura Moure/Lalín

Lalín acolleu este venres a quinta edición do Work Cocido, un evento xa consolidado dentro da programación da Feira do Cocido como espazo de encontro para profesionais de distintos ámbitos que comparten unha visión común: emprender desde a experiencia, a paixón e o compromiso. Baixo o lema “Traxectorias de vida: proxectos que inspiran”, a cita, celebrada no Edificio Sociocultural da rúa Manuel Rivero, estivo moderada por Silvia Panadeiros Vence, CEO de Work Events, quen conduciu o acto achegando dinamismo e proximidade, e poñendo en valor a importancia de xerar espazos de diálogo ao redor do emprendemento e a evolución profesional.

O encontro reuniu a perfís do ámbito artístico, gastronómico, empresarial e académico, que ofreceron unha mirada próxima e real sobre as súas traxectorias. A través das súas intervencións, os relatores compartiron experiencias marcadas por retos, aprendizaxes e decisións crave, construíndo un relato conxunto que invitou a reflexionar sobre o emprendemento desde unha perspectiva humana e diversa.

Os relatores compartiron a súa experiencia sobre como emprenden, abordando non só aspectos técnicos, senón tamén elementos clave do proceso empresarial. Durante as súas intervencións, destacaron a importancia da improvisación e a capacidade de adaptación, así como as estratexias para a venda do negocio e a comunicación efectiva do produto e dun mesmo. Así mesmo, tratáronse factores como o papel da sorte, a necesidade de xerar e coidar unha rede de contactos, e a relevancia do apoio nun camiño que, en moitas ocasións, pode resultar solitario para os empresarios.

 PUBLICIDADE

O V Work Cocido consolidouse así como un punto de conexión entre talento, ideas e vivencias, no que o público asistente puido descubrir distintas formas de entender o desenvolvemento profesional. O evento contou coa participación de Sheila Patricia, artista e produtora cultural; Fran Cañotas, presentador de Televisión de Galicia; Begoña Vázquez, chef e empresaria; Patricia Galego, empresaria no ámbito da biococina; Eva López, responsable do programa Woman Emprende da Universidade de Santiago de Compostela; e Ramiro Mejuto, xerente de Megodeza.

Desde a organización destacouse a boa acollida do evento, que volveu colgar o cartel de completo e reuniu a público interesado na innovación, o emprendemento e as historias privadas que hai detrás de cada proxecto.

 Publicidade

Preme para obter máis información.

O V Work Cocido, organizado por Work Events, contou coa colaboración do Concello de Lalín e da Asociación de Empresarios de Deza (AED Deza) así como co patrocinio de Tecglass, Kalekói, Inasus, Mejuto, Metaldeza, O Muíño de Cuíña e Nudesa, a quen a organización trasladou o seu agradecemento por facer posible esta iniciativa. Os asistentes degustaron un cocido networking en casa Currás ao finalizar o evento.