O Tribunal Superior de Xustiza anula a sentenza que impedía continuar coa tramitación da mina de Touro

• "Desde a Plataforma veciñal Mina Touro-O Pino NON seguimos defendendo o mesmo: transparencia, protección ambiental e futuro digno para a nosa terra"

• "Os feitos falan por si sós. E se é preciso acudir aos xulgados para protexer a auga, a saúde pública e o medio ambiente, farémolo", sinala o concelleiro de Medio Ambiente de Touro, Darío Rey

Ecos da Comarca/Touro/O Pino

A nova Sala do Contencioso-Administrativo do Tribunal Superior de Xustiza de Galicia revogou a sentenza que impedía continuar coa tramitación da mina de cobre de Touro. O tribunal estima o recurso presentado por Cobre San Rafael contra a resolución da Xunta que denegaba a actualización do proxecto mineiro e o plan de restauración ambiental.

En concreto, a sección terceira da Sala do Contencioso-Administrativo do TSXG deixou sen efecto a Declaración de Impacto Ambiental (DÍA) e, en consecuencia, a denegación administrativa que impediu no seu día a Cobre Santo Rafael explotar a mina de Touro e criticou a actuación da Xunta neste proxecto --iniciado en 2017 e que tivo resolución autonómica negativa en 2021--, afeando que non dese "trámite de audiencia" á promotora, negándolle "a última palabra" no proceso.

A decisión xudicial considera que a Administración galega cometeu defectos na tramitación do expediente, ao non permitir á empresa responder a informes negativos incorporados durante o proceso. Ademais, os maxistrados cuestionan parte da análise ambiental realizada pola Xunta, ao entender que se empregou unha interpretación “sesgada” dalgúns informes técnicos.

O fallo non autoriza directamente a explotación da mina, pero obriga á Xunta a retrotraer o procedemento e abrir un novo trámite de audiencia para revisar toda a documentación presentada pola empresa antes de emitir unha nova resolución. A sentenza aínda pode ser recorrida ante o Tribunal Supremo.

 PUBLICIDADE

Se queres obter máis información do evento preme na imaxe.

Ante isto, xa se pronunciou onte a Plataforma Veciñal Mina Touro O Pino Non:

"Hoxe coñecemos unha sentenza que pretende presentar á empresa mineira como vítima de “indefensión”. Pois ben: indefensión foi a que sufrimos durante anos as veciñas e veciños de Touro e O Pino. Indefensión foi pedir acceso á información ambiental e atoparnos coa opacidade constante da Xunta e da empresa promotora. Indefensión foi solicitar documentación clave e recibir silencios, atrasos e trabas administrativas. Indefensión foi ter que loitar cada papel, cada informe e cada alegación fronte a unha maquinaria política e empresarial que nunca xogou en igualdade de condicións coa veciñanza.

Agora resulta que quen contou con recursos económicos, apoio institucional e acceso privilexiado á Administración é quen se presenta como prexudicado. Un auténtico insulto para todas as persoas que levamos anos defendendo a nosa terra, a nosa auga e a nosa saúde.

Esta sentenza non borra os riscos ambientais do proxecto mineiro. Non elimina a contaminación histórica existente na zona. Non fai desaparecer as advertencias técnicas, científicas e sociais sobre o impacto brutal que esta mina tería sobre o territorio e sobre a ría de Arousa. O que queda claro é que seguimos diante dun modelo no que os intereses dunha multinacional pesan máis que os dereitos da cidadanía a ser informada, escoitada e protexida.

 PUBLICIDADE

Preme para obter máis información.

Desde a Plataforma veciñal Mina Touro-O Pino NON seguimos defendendo o mesmo: transparencia, protección ambiental e futuro digno para a nosa terra. E non imos calar por moitas sentenzas ou presións que cheguen. A nosa loita nunca foi por intereses económicos. Foi —e segue sendo— pola vida do noso territorio".

Quen tamén se pronunciou foi o concelleiro de Medio Ambiente de Touro, Darío Rey. "Como concelleiro de Medio Ambiente, preocupa moito que esta resolución chegue despois dos cambios producidos na Sala do TSXG e do relevo de maxistrados que viñan tratando estes procedementos. Son circunstancias que, cando menos, alimentan dúbidas".

En todo caso, apunta que, "o fondo do problema segue intacto: nin o proxecto anterior nin o actual aclaran con rigor o impacto real sobre as augas, as captacións privadas e os mananciais da contorna. Hai numerosos recursos hídricos que non aparecen recollidos na documentación presentada pola empresa. Precisamente por iso, desde o Concello estase traballando xa nun informe pericial independente para mapear e identificar todos os recursos hídricos potencialmente afectados e contrastar a información que figura no proxecto".

"A nosa prioridade é defender con datos, rigor técnico e todas as garantías legais os intereses da veciñanza e do territorio. Tamén cómpre desmontar a propaganda da empresa sobre unha suposta restauración ambiental exemplar. A realidade é que, máis de 30 anos despois do peche da explotación, os ríos da contorna seguen presentando presenza de metais pesados e importantes afeccións ambientais que continúan xerando preocupación entre a veciñanza e numerosos colectivos. Os feitos falan por si sós. E se é preciso acudir aos xulgados para protexer a auga, a saúde pública e o medio ambiente, farémolo", conclúe Rey.