O programa alerta escolar do 061 atende máis de 9.000 nenos con alerxias, diabetes ou epilepsia

Permite dispor dunha base de datos na cal, cunha chamada ao 061, o neno é identificado inmediatamente, o que permite acceder á medicación que debe ser administrada

Laura Moure/Xeral

O programa Alerta Escolar, coordinado pola Fundación Pública Urxencias Sanitarias de Galicia-061, atende máis de 9.000 nenos en idade escolar que sofren patoloxías crónicas na Comunidade galega. O Consello da Xunta coñeceu onte un informe sobre este programa que se implantou en Galicia no ano 2007, como resultado dun acordo de colaboración entre a Consellería de Educación, Ciencia, Universidades e Formación Profesional e a Consellería de Sanidade.

O programa trata de facilitar a atención inmediata e eficiente dos nenos que sofren alerxias a algunha substancia (xeralmente alimentaria), diabetes e epilepsia, entre outras patoloxías, susceptibles de desencadear crises agudas potencialmente mortais. Dos inscritos no programa Alerta Escolar, 5.318 nenos teñen alerxias, 1.779 foron diagnosticados como epilépticos, 781 son diabéticos, 146 teñen asma e o resto sofren outras patoloxías. Respecto á distribución por provincias, o 46 % dos inscritos no programa Alerta Escolar están na Coruña, o 37 % na provincia de Pontevedra, o 9 % en Lugo e o 8 % en Ourense.

O programa Alerta Escolar rexistrou un importante número de nenos inscritos nos últimos anos. No ano 2022 rexistráronse 1.279 nenos; en 2023 foron 1.356; en 2024 rexistráronse 1.257; e desde xaneiro ata outubro de 2025 foron 1.130 as novas inscricións. Identificación inmediata Todos os nenos inscritos no Programa Alerta Escolar están rexistrados nunha base de datos que, no caso de chamar ao 061, inmediatamente os identifica e permite acceder aos datos clínicos do paciente. Ademais, permite coñecer a medicación que debe ser administrada se o neno se encontra nunha situación de urxencia ou emerxencia sanitaria.

Publicidade

Preme na imaxe para obter máis información do evento.

O programa Alerta Escolar realízase en colaboración cos centros educativos de toda a Comunidade que contan cun rexistro dos nenos que sofren estas patoloxías e gardan a medicación prescrita. En caso de necesidade, os profesores responsables do programa no centro póñense en contacto cos sanitarios da Central de Coordinación de Urxencias Sanitarias de Galicia-061 para coordinar a asistencia destes nenos de acordo coa situación.

Como inscribirse no programa

A inscrición no programa Alerta Escolar realízase desde os centros educativos, que son os encargados de dar de alta o alumnado a través dun formulario en liña, logo de solicitude dos pais. A partir do momento da alta do alumno, a Fundación Pública 061 contacta co centro para darlle as instrucións precisas sobre os pasos que cómpre seguir en caso de urxencia e a conservación da medicación correspondente. A coordinación entre o profesorado e o persoal sanitario é un dos eixes fundamentais deste programa.

Publicidade

Preme na imaxe se quere contactar connosco.

Os centros que o soliciten poden acceder a cursos de formación sanitaria, a través dos centros de formación do profesorado, que permiten que os profesores recoñezan aquelas situacións de emerxencia en que é necesario pórse en contacto coa Central de Coordinación do 061. Estes cursos proporcionan os coñecementos necesarios para prestar unha primeira atención sanitaria cando un neno sufra unha situación de crise aguda, mentres esperan a chegada dos recursos asistenciais de Urxencias Sanitarias de Galicia-061.