O primeiro espectáculo para público infantil e familiar de Outono a escena de Arzúa será o 10 de outubro
Laura Moure/Arzúa
O Departamento de Cultura do Concello de Arzúa organiza para este sábado a primeira actuación encadrada no programa Sábados en familia incluído na programación cultural Outono a escena pensada para dinamizar as fins de semana dos meses de outubro e novembro con actuacións de artes escénicas, cine e música para todos os públicos.
O certame ofrece este sábado, 10 de outubro, unha proposta para público infantil e familiar co espectáculo Dedín, dedín, dedal.
É un espectáculo creado por Andrea Bayer e Óscar Ferreira, de Baobab Teatro, pensado para enredar, rir e bailar. Unha proposta musical e teatral para as máis pequenas e pequenos da casa onde a palabra, os xogos, os contos e as cantigas están moi presentes. A idade recomendada para participar vai dos 3 aos 8 anos.
PUBLICIDADE
A función terá lugar ás 18:00 horas na Capela da Madanela e a entrada será libre e de balde ata completar a capacidade.
PUBLICIDADE
O Concelleiro de Cultura, José Luís García anima “a todas as familias a participar neste espectáculo para achegar ás nenas e aos nenos á cultura” tendo en conta, ademais, segundo salienta o concelleiro que “se está facendo un importante esforzo na programación de actividades dirixidas a público infantil e familiar, como o demostra que nove dos dezaseis espectáculos do programa de outono son dirixidos especialmente a este tipo de público”.
Comentarios