Equina Galicia volve en xullo con categoría tres estrelas e seis importantes competicións ecuestres

Será de novo no recinto Feira Internacional de Galicia ABANCA de Silleda

Laura Moure/Silleda

Equina Galicia celebrará a súa undécima edición do 11 ao 13 de xullo. Será de novo no recinto Feira Internacional de Galicia ABANCA (Silleda, Pontevedra), onde o ring se converterá en escenario de seis importantes competicións nas que participarán destacados exemplares das mellores ganderías nacionais e tamén doutros países.

Organizado pola Asociación de Criadores de Cabalos Españois de Galicia (ACCEGA) coa colaboración da Fundación Semana Verde de Galicia, este evento terá como eixo principal o XI Campionato de España Pura Raza Española-ANCCE de Galicia, o cal volveu conseguir para esta edición a categoría tres estrelas. Por cuarto ano consecutivo a Real Asociación Nacional de Criadores de Cabalos de Pura Raza Española (ANCCE) concedeulle de novo o máximo nivel neste tipo de competicións, pola súa excelente evolución e o esforzo na súa organización, ademais de valorar novamente as infraestruturas destinadas ao concurso no recinto Feira Internacional de Galicia ABANCA.

Publicidade

Preme na imaxe para obter máis información do evento.

Esta proba, que se levará a cabo durante os tres días de Equina, será clasificatoria para a final do Campionato do Mundo, a cal se celebrará en Sevilla do 18 ao 23 de novembro, no marco do Salón Internacional de Pura Raza Española (SICAB).

Doma, enganches e equitación de traballo

Ademais do concurso morfofuncional, Equina 2025 contará con outras cinco competicións. Tres delas son xa citas consolidadas no calendario nacional de doma, sendo a XXVI Copa Accega, o Territorial e o VII Trofeo Xunta de Galicia – Medio Rural de Doma Clásica. Os dous restantes corresponderanse cunha das probas do Campionato Galego de Enganches e a outra coa II Proba da Federación de Equitación de Traballo.

Publicidade    

Preme na imaxe se queres contactar connosco.

Ademais, sumaranse outras actividades que a organización pechará proximamente, entre as que se recuperará o bautismo hípico, pensando especialmente nos nenos das comarcas de Deza e Tabeirós-Terra de Montes e co obxectivo de fomentar a equitación como actividade extraescolar e deporte para eles.