Perruquería Marisa.png

ESPAZO DISPOÑIBLE PARA ANUNCIARSE

Pladur Touro.png

ESPAZO DISPOÑIBLE PARA ANUNCIARSE

O Museo Da Terra de Melide denuncia un novo dano a un cruceiro, desta volta en Serantes, en Santiso

"Este tipo de accións, que sufren con frecuencia estes elementos tan vulnerables, deberían ser evitadas con algo tan sinxelo como poñéndolle unha protección perimetral", considera


Laura Moure/Melide

O Museo Da Terra de Melide denuncia publicamente a través das súas redes sociais o enésimo dano a un cruceiro. "E por desgraza non será o último", lamenta. En concreto fala do da parroquia de Serantes, no municipio de Santiso.


Sinala que a pasada fin de semana, "mentres faciamos o roteiro polo patrimonio de Santiso cos alumnos do CEIP de Arcediago, achegámonos ata Serantes e puidemos comprobar como o seu cruceiro foi tirado unha vez máis, e xa van moitas, por un vehículo. Este tipo de accións, que sufren con frecuencia estes elementos tan vulnerables, deberían ser evitadas con algo tan sinxelo como poñéndolle unha protección perimetral", considera o museo.

O cruceiro de Serantes. Autor: Museo Da Terra de Melide.

Algo por outra banda, tal e como indica, non conleva nin esforzo económico, nin físico, nin impide o paso de vehículos ó seu carón, e si facilita o seu coidado e preservación. "Poñendo unha simple cadea que circunde o espazo que ocupa o cruceiro utilizando o seu perímetro e sostida por uns pivotes, axudaría a que coches, camións, tractores e demais teñan un punto no que pararse antes de topar co cruceiro", explica.


Ademais, subliña que acontece o mesmo en numerosos cruceiros da bisbarra e das comarcas veciñas: Visantoña (que xa foi reparado e vallado para evitar máis atropelos), Zas de Rei (que sufre constantes agresións na súa escalinata), Liñares (e que estivo tempo sen a cruz ata que foi reparada) ou o de Maroxo en Arzúa, ("que a día de hoxe despois de ter caído, aínda non se sabe onde están a cruz e o fuste").


"O dano causado por destrozar un cruceiro é para todos, pois o patrimonio é un ben común. Se non o coidamos e protexemos estamos a perder a nosa particularidade como pobo, a nosa propia cultura, única e irrecuperable. Coidemos o patrimonio cultural e natural, xa que son as nosas raíces", recalca o museo melidense.

142 vistas0 comentarios
IRS.jpg

ESPAZO DISPOÑIBLE PARA ANUNCIARSE