O goberno de Rodeiro adopta diversos acordos centrados na mellora das infraestruturas municipais

Laura Moure/Rodeiro

No día de onte reuniuse a Xunta de Goberno Local do Concello de Rodeiro e, a continuación, o equipo de goberno baixo a coordinación de Alberte Lamazares, alcalde en funcións. Na XGL adoptaron diversos acordos centrados na mellora das infraestruturas municipais e na colaboración con outras administracións públicas.

Entre os asuntos máis destacados, aprobouse a solicitude ao abeiro do plan Vía DEPO da Deputación de Pontevedra, mediante o cal o Concello contará cunha achega de 189.634,85 euros para executar actuacións de mellora do firme en diferentes vías municipais. O investimento total da actuación, incluídos os honorarios técnicos, ascende a 203.976,98 euros.

As obras previstas inclúen a mellora dos accesos aos lugares de Barrio, Lamazares, dirección Coreixas e acceso ao lugar de Melide. Trátase de actuacións moi necesarias debido ao avanzado deterioro destas pistas, nas que non se realizaban intervencións de importancia desde hai décadas.

 PUBLICIDADE

Se queres obter máis información do evento preme na imaxe.

Dende o Goberno municipal destacouse o compromiso continuo coa mellora da rede viaria do municipio, aproveitando todos os fondos dispoñibles procedentes das diferentes administracións públicas. Neste sentido, tamén se puxo en valor a boa situación económica do Concello, que permite asumir a achega municipal correspondente sen perder ningunha liña de axuda ou subvención.

Ademais, na sesión tamén se aprobou a sinatura do convenio coa Xunta de Galicia para participar no programa de control da avespa asiática (Vespa velutina), reforzando así as medidas de prevención e protección no municipio.

 PUBLICIDADE

Preme para obter máis información.

Por último, certificouse a actuación na estrada dirección Ourín, onde o Goberno municipal decidiu investir 116.879,12 euros nunha obra considerada de máxima necesidade para os veciños e veciñas desa zona.

O Concello de Rodeiro continúa así traballando na mellora dos servizos e infraestruturas municipais, co obxectivo de ofrecer maiores condicións de seguridade e calidade de vida á veciñanza.