O Festival Internacional de Percusión de Merza celebrarase este ano en xullo e agosto

A XXI edición do FIP arranca este mércores cun programa que combina formación

especializada e concertos abertos ao público

Laura Moure/Vila de Cruces

A parroquia de Merza, no concello de Vila de Cruces, volverá converterse a partir de hoxe, mércores 15 de xullo, nun dos grandes puntos de encontro da percusión. O Festival Internacional de Percusión de Merza inicia a súa vixésimo primeira edición, dando continuidade a un proxecto formativo e cultural que leva máis de dúas décadas achegando ao rural galego intérpretes, profesorado e alumnado procedentes de Galicia, do resto do Estado e doutros países.

O FIP mantén un dos seus principais sinais de identidade: a combinación da formación musical especializada cunha programación de concertos e actuacións aberta ao público. Deste xeito, as xornadas permiten ao alumnado traballar directamente con profesionais de recoñecida traxectoria e, ao mesmo tempo, ofrecen á veciñanza a oportunidade de coñecer propostas moi diversas arredor da percusión contemporánea.

A edición de 2026 desenvolverase en dúas etapas. A primeira terá lugar esta semana, coincidindo coa actividade formativa de nivel avanzado, mentres que a segunda chegará entre os días 3 e 7 de agosto, ampliando a programación durante o verán. O festival reafirma así a súa capacidade para atraer artistas e estudantes a unha pequena parroquia rural e para descentralizar unha oferta cultural que, pola súa calidade e especialización, ten unha clara dimensión internacional.

Este ano, o Festival Internacional de Percusión conta unicamente co apoio institucional da

Deputación de Pontevedra, unha colaboración que fai posible dar continuidade a esta proposta cultural e formativa de longa traxectoria no medio rural.

Primeiros concertos no Ghalpón E Ferro

A programación musical desta semana comezará hoxe, mércores 15 de xullo, ás 21:30 horas, no Ghalpón E Ferro, coa actuación de Mujeres de la Tabarilea, formación con integrantes procedentes de Madrid e Zaragoza.

O xoves 16, tamén ás 21:30 horas e no mesmo escenario, celebrarase unha noite compartida por Merza Percusión Ensemble, integrado por alumnado e profesorado vinculado ao encontro, e o ensemble encabezado pola percusionista francesa Adélaïde Ferrière, nunha das propostas de maior proxección internacional desta edición.

 PUBLICIDADE

Preme na imaxe para obter máis información deste evento.

A programación de xullo continuará o venres 17 coa actuación de Latexo, ensemble galego especializado en ritmos de raíz brasileira. Estes concertos permitirán comprobar sobre o escenario parte do traballo realizado durante as xornadas formativas e favorecerán o encontro entre profesionais, estudantes e público.

Ademais do traballo técnico cos instrumentos, o programa formativo aborda distintas linguaxes e disciplinas relacionadas coa interpretación, a creación colectiva, o movemento escénico e a preparación para actuar ante o público. O festival procura deste xeito ofrecer unha experiencia integral, na que a aprendizaxe non se limita á aula, senón que se completa coa convivencia, os ensaios e a participación nos concertos.

Unha segunda etapa en agosto

A actividade regresará do 3 ao 7 de agosto, nesta ocasión no estudio de Odaiko, cunha nova serie de concertos ás 21:30 horas. O programa comezará o día 3 con Merza Repercute e continuará o día 4 con Odaiko Repercute Ensemble.

O 5 de agosto será a quenda da Batucada Merza Street, mentres que o día 6 actuará o

ensemble da percusionista xaponesa Kana Omori. O peche chegará o venres 7 coa participación do Iberian Marimba Ensemble, acompañado por artistas convidados.

 PUBLICIDADE

Preme na imaxe para obter máis información deste evento.

Ao longo da súa traxectoria, o Festival Internacional de Percusión foi medrando ata converterse nun referente que une formación, creación e exhibición artística. Nas súas edicións anteriores reuniu en Merza figuras nacionais e internacionais da percusión, ademais de alumnado e profesorado de diferentes procedencias, mantendo sempre unha estreita relación cos cursos de batería e percusión desenvolvidos na parroquia.

Coa XXI edición, Merza volve demostrar que unha iniciativa nacida no rural pode manter unha programación estable, especializada e con capacidade para conectar o talento local con figuras internacionais, facendo da percusión unha ferramenta de formación, convivencia e dinamización cultural.