O exconselleiro de Medio Rural Alfredo Suárez Canal será o pregoero do III Sabor Labrego de Rodeiro

A cita será o 24 de maio

Laura Moure/Rodeiro

O Sabor Labrego, que se celebrará o 24 de maio en Camba, contará con Alfredo Suárez Canal como pregoeiro desta 3° edición. Así o anunciou onte o tenente de alcalde de Rodeiro, Alberte Lamazares. "Dende o Concello decidiuse designar como pregoeiro desta edición a Alfredo Suárez Canal, conselleiro de Medio Rural da Xunta de Galicia entre os anos 2005 e 2009".

A súa elección chega despois do proceso participativo aberto pola organización para recoller propostas da cidadanía, no que o seu nome foi un dos máis repetidos polos veciños e veciñas, tal e como explica Lamazares. Durante a súa etapa á fronte da Consellería destacou pola defensa do rural galego e do sector agrogandeiro, especialmente das pequenas e medianas explotacións, impulsando políticas de desenvolvemento rural, modernización agraria e apoio ao tecido produtivo do país.

 PUBLICIDADE

Se queres obter máis información do evento preme na imaxe.

Entre as iniciativas máis salientables do seu mandato figuran tamén o impulso do Banco de Terras de Galicia, unha ferramenta pioneira para recuperar superficie agraria en abandono e poñela a disposición da actividade produtiva, así como a aposta polas Unidades de Xestión Forestal, orientadas a mellorar a ordenación e aproveitamento sostible do monte galego.

Do mesmo xeito, desde a organización de Sabor Labrego quérese destacar a especial vinculación da súa etapa de goberno co este concello, xa que foi baixo o seu mandato cando se aprobou a primeira concentración parcelaria no municipio e, ata o día de hoxe, tamén a última realizada.

 PUBLICIDADE

Preme para obter máis información.

Con este nomeamento, Sabor Labrego quere recoñecer "unha traxectoria política estreitamente ligada á defensa e valorización do rural galego, nun evento que precisamente nace coa vontade de poñer en valor o traballo, a cultura e o futuro do noso sector primario".