O Entroido arzuán incluirá concurso e baile de disfraces, un obradoiro familiar, inchables e música
Prolongarase durante catro días con distintas actividades nas que tamén haberá chocolatada popular
Laura Moure/Arzúa
O Departamento de Cultura do Concello de Arzúa organiza para o Entroido catro días de actividades que darán comezo o domingo 12 de febreiro co xa anunciado concurso de disfraces e complétase con música, un obradoiro familiar, baile, inchaches e chocolatada.
Así arranca co concurso de disfraces o domingo 12 que se celebrará a partir das 17:00 horas no Multiusos Terra do Queixo onde se desenvolverán as actuacións dos participantes e se fará a entrega dos premios que superan os 2.000 euros repartidos entre as categorías de comparsas, grupos, individual infantil, individual adulto e simpatía.
O concurso farase co público sentado e cos concursantes facendo a súa intervención sobre escenario nunha gala que estará presentada polo humorista arzuán Xan Veiga. A apertura de portas farase unha hora antes do inicio.
As actividades continúan o venres 17 coa actuación da agrupación folclórica Os Santiaguiños coa danza de Entroido, chamada O Ensaio, que están a recuperar na zona de Boimorto. Farán dous pases, o primeiro ás 18:00 horas na Residencia San José e o segundo na Praza de Galiza ás 18:30 horas.
Na xornada do sábado 18 terá lugar un obradoiro familiar de elaboración de sombreiros de Entroido. Celebrarase na Biblioteca Municipal Rosalía de Castro a partir das 17:30 horas. Para participar é obrigatorio inscribirse previamente no Departamento de Cultura ou no teléfono 981 500 222 do 1 ao 15 de febreiro. Cada menor deberá acudir acompañado dunha persoa adulta. A actividade é de balde e as prazas limitadas.
A programación complétase na tarde do martes de Entroido, o día 21 de febreiro, cun baile de disfraces en horario de 17:00 a 20:00 horas que contará con inchables, chocolatada popular e coa actuación do dúo musical Estrellas. Estas actividades realizaranse na Praza de Galiza ou, en caso de mal tempo, no Multiusos Terra do Queixo.
A Concelleira de Cultura, Aurora Varela, afirmou esta mañá sentirse “moi satisfeita pola programación artellada e pensada para o desfrute de todos os públicos e para todas as idades” e anima “a toda a veciñanza e visitantes a vivir en primeira persoa estas festas que significan moito para as nosas tradicións e cultura”.
NOTICIA RELACIONADA:
Toda a información sobre o concurso de Entroido de Arzúa: https://www.ecosdacomarca.com/post/o-concello-de-arz%C3%BAa-repartir%C3%A1-un-total-de-2-120-euros-en-premios-no-seu-concurso-de-disfraces
Comentarios