Repartiranse tres premios por valor de 1.000, 500 e 250 euros respectivamente
Laura Moure/Melide
O Concello de Melide vén de lanzar unha nova edición do Concurso de Escaparates de Nadal. Calquera establecemento comercial do municipio pode participar nesta nova edición, enfeitando o seu escaparate con decoración relacionada cos motivos e ambientes natalicios, de forma que se contribúa a adornar Melide nestas entrañables datas.
Á hora de seleccionar os establecementos gañadores, o xurado terá en conta a orixinalidade, a montaxe, a estética, a creatividade e mais a ambientación propia do Nadal da decoración. Se hai texto incluído na composición, este deberá estar redactado en galego.
Nesta edición, o concurso volve contar cun primeiro premio de 1.000 euros, un segundo de 500 € e un terceiro por valor de 250 €.
Para participar no concurso, os escaparates deberán permanecer decorados polo menos entre o 12 de decembro de 2022 e o 6 de xaneiro de 2023. A inscrición pode facerse enviando un correo electrónico ao enderezo promocioneconomica@concellodemelide.gal antes do 9 de decembro.
O xurado fará pública a súa decisión o luns 9 de xaneiro de 2023 ás 12 horasno Salón de Plenos da Casa do Concello.
