O Concello reforza de urxencia a seguridade na ponte de Abades tras a caída de dous petrís de pedra

ADIF xa inspeccionou a zona e non aprecia risco para a circulación ferroviaria

Laura Moure/Silleda

O Concello de Silleda activou unha actuación de emerxencia na ponte de Abades, situada sobre a vía do ferrocarril, despois da caída de dous petrís de pedra nun dos extremos da plataforma. O incidente non provocou danos persoais nin afectou á circulación ferroviaria, xa que as pezas desprendidas caeron polo talude e quedaron fóra da zona de paso dos

trens. Unha delas localizouse a varios metros do inicio do balastro da vía.

A caída detectouse nunha zona de paso habitual de vehículos agrícolas e, segundo as primeiras valoracións, todo apunta a que puido estar provocada polo golpe dalgunha maquinaria pesada. Polo momento non foi posible identificar á persoa ou vehículo responsable.

Nada máis ter coñecemento da incidencia, o Concello contactou directamente coa sección de mantemento de ADIF, que desprazou persoal á zona para realizar unha inspección. Tras esa revisión, non se detectou unha situación de perigo para a circulación ferroviaria.

Así, Concello e ADIF acordaron entón a adopción dunha medida provisional de seguridade no paso, que será executada pola administración local, mentres se avanza na definición dunha solución integral para a ponte, que deberá contar coa correspondente autorización do organismo ferroviario.

 PUBLICIDADE

Se queres obter máis información do evento preme na imaxe.

Como primeira medida, o Concello colocou sinalización provisional, valado e iluminación para advertir da situación aos vehículos que transitan polo paso. Esta actuación completarase ao longo desta semana coa instalación dun valado fixo con biondas de seguridade, que permitirá protexer o punto afectado e garantir unhas mellores condicións de circulación.

A alcaldesa, Paula Fernández Pena, explica que “a prioridade foi actuar con rapidez, comprobar que non existía risco para a vía ferroviaria e adoptar medidas inmediatas para reforzar a seguridade dos vehículos que utilizan este paso”. A rexedora engade que “aínda que a incidencia non chegou a afectar á circulación dos trens, non podemos deixar un punto destas características sen unha protección axeitada”.

Esta intervención de emerxencia realizarase á espera da redacción dun proxecto de mellora integral do ponte, no que se estudará unha solución máis completa para a estrutura e que deberá contar coa autorización de ADIF por tratarse dun paso situado sobre a vía ferroviaria.

 PUBLICIDADE

Preme para obter máis información.

O Concello tamén iniciará unha revisión do estado doutros pontes do municipio, co obxectivo de comprobar as súas condicións de conservación e anticiparse a posibles incidencias. “Imos actuar agora en Abades, pero tamén queremos revisar outras estruturas para detectar calquera problema a tempo e evitar situacións semellantes”, sinala Fernández Pena.

A alcaldesa lembra ademais a importancia de extremar a precaución cando se circula con maquinaria agrícola por pasos estreitos ou estruturas antigas. “Son elementos que forman parte da rede viaria local e que prestan servizo diario á veciñanza, pero precisan dun uso responsable e dunha protección axeitada para garantir a seguridade de todos”, conclúe.