O Concello pon en marcha Silleda Dinamiza para revitalizar os centros sociais do rural

Laura Moure/Silleda

O Concello de Silleda lanza o proxecto Silleda Dinamiza, unha iniciativa que busca revitalizar os centros sociais das parroquias e fomentar a interacción entre a veciñanza, especialmente nas zonas rurais máis afectadas polo despoboamento e o avellentamento da poboación.

O programa estrutúrase arredor dun calendario de apertura dos centros sociais, permitindo que se convirtan en espazos de encontro e dinamización comunitaria. Para iso, contarase co apoio de asociacións ou de ser o caso con persoas voluntarias que colaborarán na xestión e organización das actividades. “Somos conscientes de que ademais da tendencia habitual de traslado da poboación do rural ás vilas, a pandemia tamén mudou moitos hábitos e afectou no caso das parroquias á actividade nos centros sociais”, indica a alcaldesa, Paula Fernández.

Esta iniciativa parte despois dunha análise sobre a situación do rural de Silleda, onde ademais do envellecemento da poboación tamén foron desaparecendo nos últimos anos locais adicados á hostalería, ultramarinos e mesmo se viron reducidos os calendarios das celebracións relixiosas, que no caso do rural son un punto de encontro e interacción social.

A proposta, promovida dende a Concellería de Medio Rural e a de Participación Cidadá arrancará cun proxecto piloto sobre o que se avaliará o impacto e a resposta da veciñanza. O obxectivo é adaptar o modelo de funcionamento ás necesidades reais das comunidades locais.

Para garantir que a iniciativa sexa coñecida e aproveitada polo maior número de persoas posible, realizaranse encontros informativos en distintas parroquias. Nestes encontros, explicarase en detalle en que consiste o proxecto, os beneficios que pode achegar á comunidade e como as persoas interesadas poden participar activamente, xa sexa como usuarias dos centros ou como voluntarias na súa dinamización.

Publicidade

Preme na imaxe se queres contactar connosco.

A información tamén se difundirá a través de carteis informativos, redes sociais e colaboracións con asociacións locais, para que ningunha parroquia quede sen coñecer esta oportunidade de revitalización social.

O Concello de Silleda, que tamén está a impulsar unha serie de melloras en varios dos centros sociais do rural, convida á veciñanza a sumarse a este proxecto, ben participando nas actividades, ou ben formando parte do voluntariado para a apertura destes centros.

“Iremos informando sobre esta iniciativa para revitalizar os centros sociais e facer que a veciñanza teña nestes un punto de referencia e encontro”, engade Paula Fernández destacando a colaboración dos colectivos veciñais do rural, que serán tamén “un piar fundamental desta iniciativa e cos primeiros que se dará a coñecer a nosa proposta”, subliña.